1 րոպեի ընթերցում
ԵՐԵՎԱՆ, 8 ՀՈՒՆԻՍԻ, ԱՐՄԵՆՊՐԵՍ: Վարչապետ Նիկոլ Փաշինյանը Լոռու մարզի Ալավերդի քաղաք կատարած այցի շրջանակներում ծանոթացել է նաև քաղաքի Թումանյան փողոցում ջրհեղեղից հետո տիրող իրավիճակին և հետևել իրականացվող վերականգնողական աշխատանքներին։
«Արմենպրես»-ի հաղորդմամբ՝ այս մասին ՀՀ վարչապետը «Ֆեյսբուքի» իր էջում գրառում է կատարել՝ կից հրապարակելով նաև տեսանյութ, որտեղ նա զրուցում է փողոցի խանութների սեփականատերերի հետ։
«Ալավերդու Թումանյան փողոցում ևս իրականացվել են վերականգնման աշխատանքներ, որոշ խանութներ և սպասարկման օբյեկտներ վերսկսել են գործունեությունը»,-գրառման մեջ նշել է Նիկոլ Փաշինյանը։
Վարչապետը, զրուցելով սեփականատերերի հետ, ընդգծել է, որ գրանցված սեփականատերերին հատկացվելիք օժանդակությունը կախված է լինելու տվյալ խանութի առևտրի շրջանառության ծավալներից, քանի որ Կառավարության նպատակն է այնպես անել, որ դրանք աղետից հետո կարողանան վերսկսել իրենց բնականոն աշխատանքը։
Նիկոլ Փաշինյանն այցելել է նաև բնակելի տներ և ծանոթացել բնակիչների կրած վնասներին։
Բնակիչները շնորհակալություն են հայտնել վարչապետին իրականացվող աշխատանքների և տրամադրվող աջակցության համար։