1 րոպեի ընթերցում
ԳԱՎԱՌ, 30 ՄԱՅԻՍԻ, ԱՐՄԵՆՊՐԵՍ։ Ուսումնական տարվա ավարտը Գեղարքունիքի մարզի Սևան համայնքի Չկալովկա գյուղի միջնակարգ դպրոցի համար նշանավորվել է հաճելի և սպասված անակնկալով։
Ինչպես «Արմենպրես»-ը տեղեկացավ Սևանի համայնքապետարանի աշխատակազմից, դպրոցական նոր գույքը նվիրաբերվել է ԱՄՆ «Հայ դպրոց» հիմնադրամի կողմից։
Հիմնադրամի նվիրատուների ջանքերով դպրոցի գույքն ամբողջովին նորացվել է, ինչի շնորհիվ նոր ուսումնական տարվա մեկնարկից Չկալովկայի դպրոցականներն իրենց դասերը կանցկացնեն նոր և հարմարավետ գույքի առկայությամբ։
«Հայ դպրոց» հիմնադրամի Սևանի տարածքի պատասխանատու Պապ Հայրապետյանի տեղեկացմամբ՝ ընդառաջ գնալով Չկալովկայի դպրոցի տնօրինության խնդրանքին և գույքագրելով կարիքները՝ հիմնադրամը փոխել է դպրոցի ամբողջ գույքը՝ հատկացնելով տարբեր չափսերի աշակերտական աթոռներ, ուսուցչական սեղան-աթոռներ, կախիչներ, գրատախտակներ, համակարգչային սեղաններ, գրապահարաններ։
«Հայ դպրոց» հիմնադրամի նվիրատվության հաջորդ հասցեն Սևան համայնքի Նորաշեն գյուղի դպրոցն է։
Մինչ այս նվիրատվությունը՝ «Հայ դպրոց» հիմնադրամը դպրոցական գույք է նվիրաբերել Սևան քաղաքի և համայնքի մյուս գյուղական բնակավայրերի դպրոցներին։
Խոսրով Խլղաթյան