2 րոպեի ընթերցում
ԵՐԵՎԱՆ, 7 ՄԱՅԻՍԻ, ԱՐՄԵՆՊՐԵՍ: Հայաստանի կառավարությունը համաձայն չէ, որ իր փոխարեն որոշում կայացնեն ուրիշները, և այս առումով Հայաստանի Հանրապետությունը գնում է դեպի իր ինքնիշխանություն՝ մի տեղ, որի իրավունքը ոչ ոք չի կարող վիճարկել:
«Արմենպրես»-ի թղթակցի հաղորդմամբ՝ այս մասին մայիսի 7-ի ասուլիսում ասաց ՀՀ վարչապետ Նիկոլ Փաշինյանը՝ անդրադառնալով Ռուսաստանից հեռանալու, Եվրամիության հետ հարաբերությունները զարգացնելու վերաբերյալ հարցը:
«Այդ ինքնիշխանությունն արձանագրելուց հետո մենք մեր ինքնիշխանության շրջանակներում կորոշենք՝ ում հետ, ինչ հարաբերություններ ունենանք։ Այդ հարաբերությունների կառուցման համատեքստում ենք մենք կայացնում որոշումներ»,-ընդգծեց վարչապետը:
Նրա խոսքով՝ իրական Հայաստանի տեսլականն այն մասին է, որ հայ ժողովուրդը դադարեցնում է քաղաքական, միջազգային կամ աշխարհաքաղաքական գաղթի գործընթացը և տնավորվում՝ որպես ինքնիշխան պետություն:
«Եվ մենք բոլորի հետ պետք է ունենանք հարաբերություններ․ մեր հարաբերությունների հիմքը պետք է լինի մեր ինքնիշխանությունը»,-հավելեց Փաշինյանը՝ շեշտելով, որ հայ ժողովուրդը գտել է իր տեղը և գնալու տեղ այլևս չունի:
Նա համոզմունք հայտնեց, որ շատ տարօրինակ և ինչ -որ չափով ոչ հարգալից մոտեցում է, երբ զարմանում են և նույնիսկ վրդովվում են, որ Հայաստանը Եվրոպական Միության հետ հարաբերությունները զարգացնում և խորացնում է:
«Իսկ ինչու չպետք է խորացնի: Մեզ որևէ մեկը հարցնո՞ւմ է, երբ այն ուղղություններով, որտեղ մենք կարող ենք խնդիր տեսնել, խորացնում է հարաբերությունները, ինչը՝ մեր ընկալմամբ, տեղի է ունենում մեր շահերի հաշվին: Երբ հարցնում ենք ինչո՞ւ, պատասխանում են՝ «մենք ինքնիշխան պետություն ենք»: Մենք էլ ենք ինքնիշխան պետություն: Մենք պատրաստ ենք խորհրդակցել, քննարկել, երկխոսել, բայց թույլտվություն ստանալու ռեժիմ չկա, որովհետև մենք ինքնիշխան պետություն ենք»,-ասաց Փաշինյանը՝ ինքնիշխանության տեսանկյունից կարևորելով հարաբերությունների կառուցումը բոլորի հետ: