Միջազգային

ԱՄՆ-ն հավանություն է տվել Ուկրաինային 138 մլն դոլարի HAWK ԶՀՀ-ների սպասարկման համակազմերի վաճառքին

2 րոպեի ընթերցում

ԱՄՆ-ն հավանություն է տվել Ուկրաինային 138 մլն դոլարի HAWK ԶՀՀ-ների սպասարկման համակազմերի վաճառքին

ԵՐԵՎԱՆ, 10 ԱՊՐԻԼԻ, ԱՐՄԵՆՊՐԵՍ: ԱՄՆ պետքարտուղարությունը հավանություն է տվել Ուկրաինային 138 միլիոն դոլար գումարի ռազմական տեխնիկայի հնարավոր շտապ վաճառքին HAWK զենիթահրթիռային համակարգերի սպասարկման համար: «Արմենպրես»-ի փոխանցմամբ՝ այս մասին հաղորդում է ԱՄՆ Պաշտպանության և անվտանգության համագործակցության գործակալությունը:

«HAWK հրթիռային համակարգն աշխատանքային վիճակում պահելը կբարձրացնի Ուկրաինայի կարողությունը` պաշտպանելու իր ժողովրդին և կարևոր ազգային ենթակառուցվածքները», - ասվում է հաղորդագրության մեջ:

Նշվում է, որ միջոցները կօգտագործվեն կապի համակարգերի նախագծման և ինտեգրման, համակարգերի արդիականացման, գործիքների հավաքածուների և փորձարկման սարքավորումների, պահեստամասերի, վերապատրաստման և ԱՄՆ-ի կողմից այլ աջակցության համար:

Հաղորդագրության մեջ ասվում է նաև, որ HAWK-ի ֆինանսավորումը համապատասխանում է ԱՄՆ-ի շահերին, ուստի Պետքարտուղարությունը մերժել է այդ գործարքի «վերանայման վերաբերյալ Կոնգրեսի պահանջները»՝ սպառազինությունների արտահանման վերահսկման օրենքին համապատասխան:

Պենտագոնի պաշտպանության և անվտանգության համագործակցության գործակալությունը հնարավոր վաճառքի մասին անհրաժեշտ ծանուցումը Կոնգրեսին ուղարկել է ապրիլի 9-ին։

AREMNPRESS

Հայաստան, Երևան, 0002, Մարտիրոս Սարյան 22

+374 11 539818
contact@armenpress.am
fbtelegramyoutubexinstagramtiktokdzenspotify

Ցանկացած նյութի ամբողջական կամ մասնակի վերարտադրման համար անհրաժեշտ է «Արմենպրես» լրատվական գործակալության գրավոր թույլտվությունը

© 2024 ARMENPRESS

Ստեղծվել է՝ MATEMAT-ում