Իրանի նախագահն ԱԽ նիստ է անցկացրել Դամասկոսում հյուպատոսության վրա Իսրայելի հարձակման առնչությամբ

ԵՐԵՎԱՆ, 2 ԱՊՐԻԼԻ, ԱՐՄԵՆՊՐԵՍ: Իսլամական Հանրապետության նախագահ Էբրահիմ Ռայիսիի մասնակցությամբ տեղի է ունեցել Իրանի Ազգային անվտանգության բարձրագույն խորհրդի (ԱԱԲԽ) նիստ՝ Դամասկոսում Իրանի հյուպատոսության վրա հարվածի կապակցությամբ, որի մեջ մեղադրում են Իսրայելի ռազմաօդային ուժերին։ Այդ մասին «Արմենպրես»-ը տեղեկանում է ՏԱՍՍ գործակալությունից:

«Սիոնիստական ​​վարչակարգի (խմբ.` Իսրայելի) հերթական պատերազմական հանցագործությունից հետո շենքերի և քաղաքացիների դեմ, որոնք դիվանագիտական ​​անձեռնմխելիություն ունեն, ինչպես նաև գեներալ Մոհամմադ Ռեզա Զահեդիի նահատակությունից հետո Ազգային անվտանգության բարձրագույն խորհուրդը երեկ (ապրիլի 1-ի) երեկոյան ժամը 21:00-ին անցկացրել է նիստ նախագահի և Խորհրդի քարտուղարի մասնակցությամբ», - ասված է Ազգային անվտանգության բարձրագույն խորհրդի մամուլի ծառայության հաղորդագրության մեջ։

Հաղորդագրության մեջ նշված է, որ հանդիպման ընթացքում «ընդունվել են համապատասխան որոշումներ»։ Հայտարարության մեջ այլ մանրամասնություններ չեն հաղորդվում:

Իսլամական հեղափոխության պահապանների կորպուսը (ԻՀՊԿ) հաղորդել է, որ Դամասկոսում Իրանի հյուպատոսության վրա Իսրայելի օդուժի հարձակման ժամանակ զոհվել է յոթ ռազմական խորհրդական, այդ թվում՝ գեներալներ Մոհամմադ Ռեզա Զահեդին և Մոհամմադ Հադի Հաջի Ռահիմին և հինգ սպաներ:

Իր հերթին Al Hadath հեռուստաընկերությունը հայտնել է, որ հրթիռային հարվածի հետևանքով զոհերի թիվը հասել է առնվազն 11-ի այն բանից հետո, երբ փլատակներից դուրս են բերվել ևս մի քանի հոգու մարմիններ։ Բացի ԻՀՊԿ-ի 7 զինվորականներից, ըստ հեռուստաալիքի, 3-ը Սիրիայի քաղաքացիներ են, ևս մեկը՝ լիբանանցի։