Իրանում կրակի տոնախմբության ժամանակ 26 մարդ է զոհվել, 4300-ից ավելի մարդ՝ վիրավորվել
1 րոպեի ընթերցում
ԵՐԵՎԱՆ, 13 ՄԱՐՏԻ, ԱՐՄԵՆՊՐԵՍ։ Իրանում «Չահարշանբե-Սուրի» կրակի տոնախմբության ժամանակ զոհվել է 26 մարդ, ավելի քան 4360 մարդ վիրավորվել է։ «Արմենպրես»-ի փոխանցմամբ՝ այս մասին հաղորդում է Mehr գործակալությունը։
Ըստ հրապարակման՝ ամեն տարի իշխանություններն իրականացնում են հրավառության վտանգների մասին հանրության իրազեկությունը բարձրացնելուն ուղղված արշավներ։
«Չահարշանբե-Սուրի» թարգմանաբար նշանակում է «չորեքշաբթի-կրակի կարմիր գույն»։ Տոնախմբությունը տեղի է ունենում իրանական Նոր տարվան նախորդող վերջին չորեքշաբթի օրվա նախօրյակին, այս տարի՝ մարտի 12-ի երեկոյան։ Նովրուզից մեկ շաբաթ առաջ իրանցիներն ընտանիքի անդամների և ընկերների հետ հավաքվում են խարույկների կողքին և դրանք վառ են պահում մինչև լուսաբաց։
Ամենամյա տոնախմբությունն ունի 2500 տարվա պատմություն։