Գյումրիում անցկացվեց «Առողջությունը՝ բարեկեցության գրավական. WiRED» եռօրյա դասախոսությունների շարքը
2 րոպեի ընթերցում
ԳՅՈՒՄՐԻ, 3 ՄԱՐՏԻ, ԱՐՄԵՆՊՐԵՍ: Գյումրիում փետրվարի 29-ից մարտի 2-ն անցկացվեց «Առողջությունը՝ բարեկեցության գրավական. WiRED» եռօրյա եռօրյա դասախոսությունների շարքը, որի նպատակն էր բնակչության շրջանում ոչ ֆորմալ կրթության միջոցով նպաստել հանրային առողջության ամրապնդմանը, հասարակության առողջ ապրելակերպին և առողջապահական-բժշկական առաջնային գիտելիքներ ստանալուն։
Ինչպես տեղեկացնում է «Արմենպրես»-ը, միջոցառման ընթացքում մասնագետները ներկայացրեցին Հայաստանում առավել տարածված հիվանդությունների առողջապահական-կրթական մոդուլները:
Ողջունելով ծրագրի մասնակիցներին՝ «WiRED International» միջազգային առողջապահական կազմակերպության հայաստանյան ներկայացուցիչ, Սեբուհ Բաղդոյանը տեղեկացրեց, որ ծրագրի նպատակն է շահառու խմբերի շրջանում ոչ ֆորմալ կրթության միջոցով նպաստել հանրային առողջության ամրապնդմանը, հասարակության առողջ ապրելակերպին և առողջապահական-բժշկական առաջնային գիտելիքներ ստանալուն, ինչպես նաև խթանել հանրային իրազեկումը առողջապահական ոլորտի ծրագրերի վերաբերյալ, Հայաստանի այլ շրջաններում համայնքային առողջապահական աշխատողների նոր խմբերի ձևավորումը, առողջապահական-տեղեկատվական աջակցությունը, նրանց հանրային առողջության և առողջապահական, բժշկական հիմնարար գիտելիքների փոխանցումը։
Դասախոսությունների շարքին մասնակցեցին Գյումրիում բնակվող 18-70 տարեկան քաղաքացիներ՝ բուժքույրեր, մանկավարժներ, ուսանողներ, հասարակական կազմակերպությունների, առողջապահական և սոցիալական ոլորտի աշխատակիցներ:
Միջոցառման բանախոսներն էին հանրային առողջության մասնագետ Արման Աղիկյանը, ընտանեկան ստոմատոլոգ, բժիշկ-օրդինատոր Սևակ Պապոյանը և հոգեբան Լուիզա Մարդոյանը։ Դասընթացի կազմակերպիչն է Wired International Armenia կազմակերպությունը՝ «Միասին» ՀԿ-ի և «Հայկական Կարիտաս»-ի հետ համագործակցաբար:
Ավարտին մասնակիցները ստացան մասնակցության հավաստագրեր։
ԱրմենուհիՄխոյան