Դա պատասխանատվությունից փախչել է. Ալեն Սիմոնյանն անթույլատրելի է համարում արտահերթ ընտրությունները
1 րոպեի ընթերցում
ԵՐԵՎԱՆ, 27 ՓԵՏՐՎԱՐԻ, ԱՐՄԵՆՊՐԵՍ: Ազգային ժողովի նախագահ Ալեն Սիմոնյանն անթույլատրելի է համարում երկրում արտահերթ խորհրդարանական ընտրությունների անցկացումը, իշխող քաղաքական ուժը պատասխանատվություն է վերցրել ու մինչև վերջ կտանի:
«Արմենպրես»-ի փոխանցմամբ՝ Սիմոնյանը նման դիրքորոշում հայտնեց ԱԺ-ում լրագրողների հետ զրույցում՝ անդրադառնալով հարցին, թե արդյո՞ք իշխանությունը նոր ընտրությունների մտադրություն ունի:
«Նոր ընտրություններն անթույլատրելի են: Դա պատասխանատվությունից փախչել է: ՀՀ քաղաքացիներն արդեն իրենց ընտրությունը կատարել են, և նման հարց չի քննարկվում, չի քննարկվել»,-ասաց Սիմոնյանը:
Ըստ նրա՝ սա պատասխանատու դիրքորոշում է և թիմի միասնական որոշումն է:
Սիմոնյանը հավելեց՝ իրենց քաղաքական ուժը վերցրել է պատասխանատվություն և մինչև վերջ կտանի: «Մենք առաքելություն ունենք՝ Հայաստանի Հանրապետությանը և մեր տարածաշրջանին խաղաղություն բերելը: Դրանից հետո ընտրությունների ժամանակը կգա, մենք կներկայացնենք մեր տեսլականը, մեր ընդդիմադիր գործիչները՝ իրենց տեսլականը: Եվ ՀՀ ժողովուրդը կրկին կգնա ազատ, արդար ընտրություններով կքվեարկի և կընտրի այն իշխանությանը, որ կգտնի ճիշտ»,-եզրափակեց ԱԺ նախագահը: