ՆԳՆ ոստիկանության Երևան քաղաքի վարչությունն ամփոփել է 2023-ի աշխատանքը
2 րոպեի ընթերցում
![ՆԳՆ ոստիկանության Երևան քաղաքի վարչությունն ամփոփել է 2023-ի աշխատանքը](http://armenpress.am/resized/480/static/news/b/2024/02/1129893.jpg)
ԵՐԵՎԱՆ, 8 ՓԵՏՐՎԱՐԻ, ԱՐՄԵՆՊՐԵՍ։ ՆԳՆ ոստիկանության Երևան քաղաքի վարչությունում փետրվարի 8-ին ՆԳՆ ոստիկանության պետ-ներքին գործերի նախարարի տեղակալ, ոստիկանության գեներալ-մայոր Արամ Հովհաննիսյանի նախագահությամբ տեղի է ունեցել օպերատիվ խորհրդակցություն:
Ինչպես «Արմենպրես»-ին տեղեկացրին ՀՀ ներքին գործերի նախարարության ոստիկանությունից, ամփոփվել են 2023 թ. 12 ամիսների ընթացքում ՆԳՆ ոստիկանության Երևան քաղաքի վարչության և ենթակա ստորաբաժանումների կողմից իրականացված օպերատիվ-ծառայողական գործունեության արդյունքները:
«Բացման խոսքով հանդես եկավ ոստիկանության պետ, ոստիկանության գեներալ-մայոր Արամ Հովհաննիսյանը:
ՆԳՆ ոստիկանության Երևան քաղաքի վարչության պետի օպերատիվ գծով տեղակալ, ոստիկանության գնդապետ Խորեն Բարխոյանը ներկայացրեց հաշվետու ժամանակահատվածում վարչության և ենթակա ստորաբաժանումների իրականացրած օպերատիվ-ծառայողական գործունեության աշխատանքների արդյունքները:
Նա անդրադարձավ ստորաբաժանումների կողմից իրականացված ինչպես թվային, այնպես էլ օպերատիվ և ծառայողական աշխատանքներին:
Անդրադարձ եղավ նաև արձանագրված թերություններին: Նշվեց, որ չնայած վարչության և ենթակա ստորաբաժանումների աշխատանքի արդյունքները, ընդհանուր առմամբ, դրական են, այնուամենայնիվ, առկա թերացումներն ու բացթողումները վերացնելու ուղղությամբ պետք իրականացնել ամենօրյա հետևողական աշխատանք»,- ասվում է հաղորդագրության մեջ:
Ըստ աղբյուրի՝ խորհրդակցության ընթացքում եղան քննարկումներ, վերլուծվեցին խնդիրների արագ լուծման հնարավորությունները:
Անդրադարձ է կատարվել նաև ոստիկանությունում իրականացվող բարեփոխումներին, մասնավորապես՝ Քրեական ոստիկանության ձևավորմանն ու կադրային համալրումներին:
Նշվում է, որ ոստիկանության գեներալ-մայոր Արամ Հովհաննիսյանի կողմից տրվեցին մի շարք հանձնարարականներ՝ ինչպես առանձին դեպքերով, այնպես էլ ընդհանուր աշխատանքների վերաբերյալ: