ՌԴ-ի և Իրանի պաշտպանության նախարարները քննարկել են համագործակցությունը և տարածաշրջանային անվտանգությունը
2 րոպեի ընթերցում
ԵՐԵՎԱՆ, 15 ՀՈւՆՎԱՐԻ, ԱՐՄԵՆՊՐԵՍ: ՌԴ պաշտպանության նախարար Սերգեյ Շոյգուն և Իրանի նրա պաշտոնակից Մոհամմադ Աշտիանին հունվարի 15-ին կայացած հեռախոսային բանակցությունների ընթացքում քննարկել են ռազմական, ռազմատեխնիկական համագործակցությունը և տարածաշրջանային անվտանգությունը: Այդ մասին «Արմենպրես»-ը տեղեկանում է «Ինտերֆաքս» գործակալությունից:
«Բանակցությունների ընթացքում քննարկվել են երկկողմ ռազմական և ռազմատեխնիկական համագործակցության հրատապ հարցեր, ինչպես նաև կարծիքներ են փոխանակվել տարածաշրջանային անվտանգության հարցերի շուրջ», - ասվում է ՌԴ պաշտպանության նախարարության հաղորդագրության մեջ։
«Ռուսաստանի պաշտպանական գերատեսչության ղեկավար բանակի գեներալ Սերգեյ Շոյգուն նշել է, որ Մոսկվան և Թեհրանը հետևողականորեն մեծացնում են համատեղ ջանքերը` ի շահ իսկապես իրավահավասար բազմաբևեռ աշխարհի կառուցման», -ասվում է հաղորդագրության մեջ։
Նշվում է նաև, որ երկու երկրները պատրաստվում են միջպետական համաձայնագիր ստորագրել։
«Կողմերն ընդգծել են իրենց հավատարմությունը ռուս-իրանական հարաբերությունների հիմնարար սկզբունքներին, ներառյալ` միմյանց ինքնիշխանության և տարածքային ամբողջականության անվերապահ հարգմանը, ինչը կհաստատվի Ռուսաստանի Դաշնության և Իրանի Իսլամական Հանրապետության միջև ստորագրման պատրաստվող միջպետական մեծ համաձայնագրում», - հավելել են ՌԴ պաշտպանության նախարարությունում։