Գերմանիայի հիվանդանոցներից մեկում հրդեհի հետևանքով զոհերի թիվը հասել է 5-ի

ԵՐԵՎԱՆ, 6 ՀՈՒՆՎԱՐԻ, ԱՐՄԵՆՊՐԵՍ: Գերմանիայի Իլցեն քաղաքի հիվանդանոցում բռնկված հրդեհի հետևանքով զոհերի թիվը հասել է 5-ի։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտնել են տեղի ոստիկանությունից։

Նախապես հաղորդվում էր չորս զոհի և մեկ անհետ կորածի մասին։

«Ներքին Սաքսոնիայի ոստիկանության տվյալներով՝ Իլցենիենի «Հելիոս» կլինիկայում բռնկված հրդեհի հետևանքով զոհերի թիվը հասել է 5-ի: Ոստիկանության տվյալներով՝ ևս 21 մարդ վիրավորվել է, մի քանիսը ծանր»,- ասված է հաղորդագրության մեջ։

Ավելի վաղ հաղորդվում էր, որ հրդեհը բռնկվել է ուշ երեկոյան, այն սկսվել է շենքի երրորդ հարկում և տարածվել մի քանի սենյակների ուղղությամբ։ Մարդիկ հիվանդանոցից տարհանվել են հրշեջ մեքենաների սանդուղքների միջոցով։ Ընդհանուր առմամբ՝ ներգրավվել է 140 փրկարար։ Հրդեհի պատճառը դեռևս հայտնի չէ։