Երևանում վերջին հրաժեշտը տվեցին «Արարատ-73»-ի լեգենդ Նիկոլայ Ղազարյանին
3 րոպեի ընթերցում
![Երևանում վերջին հրաժեշտը տվեցին «Արարատ-73»-ի լեգենդ Նիկոլայ Ղազարյանին](http://armenpress.am/resized/480/static/news/b/2023/12/1126715.jpg)
ԵՐԵՎԱՆ, 21 ԴԵԿՏԵՄԲԵՐԻ, ԱՐՄԵՆՊՐԵՍ: Երևանում՝ Կոնդի Սուրբ Հովհաննես եկեղեցում, վերջին հրաժեշտը տվեցին «Արարատ-73»-ի լեգենդար ֆուտբոլիստ Նիկոլայ Ղազարյանին:
Նիկոլայ Ղազարյանին հոգեհանգստին ներկա էին ավագ սերնդի, հայկական սպորտի ներկայիս ու լեգենդար թիմի մի շարք ֆուտբոլիստներ:
«Արմենպրես»-ի հետ զրույցում ՀՀ ԿԳՄՍ նախարարի տեղակալ Կարեն Գիլոյանը Նիկոլայ Ղազարյանին բնութագրեց, որպես իր սերնդի ֆուտբոլիստների լավագույն ներկայացուցիչներից մեկը:
«Ժամանակն անողոք է: Նիկոլայ Ղազարյանը լուսահոգի դարձավ, բայց ինքը շատ վառ անհատականություն էր: Իսկ ֆուտբոլում հիշվում է որպես հրթիռային արագությամբ ֆուտբոլիստ, մեծ հաղթանակներ կերտած ֆուտբոլիստ»,-ասաց Գիլոյանը: Վերջինս իր խորին ցավակցությունը հայտնեց Ղազարյանի ընտանիքին, ընկերներին:
«Արարատ-73»-ի ֆուտբոլիստ Սերգեյ Պողոսյանը հիշում է Նիկոլայ Ղազարյանին որպես կենսուրախ և ինքնատիպ ֆուտբոլիստի, որն իր բացառիկ ներդրումն է ունեցել «Արարատ»-ի լեգենդար հաղթանակներում:
««Արարատ-73»-ի այն լեգենդար թիմից արդեն մեզ հետ չեն 7 ֆուտբոլիստներ: Նիկոլայի կորուստը միայն ընտանիքի, ընկերներիս կորուստ չէ, այլ հայ ֆուտբոլասերինը, ով տեսել է, թե ինչպիսի ֆուտբոլիստ էր Կոլյան»,-ասաց նա:
Նիկոլայ Ղազարյանը միջազգային կարգի սպորտի վարպետ էր, ՀՀ ֆիզիկական կուլտուրայի և սպորտի վաստակավոր գործիչ, 2013 թվականի հոկտեմբերի 10-ին հայկական ֆուտբոլի զարգացման գործում ներդրած նշանակալի ավանդի և ձեռք բերած փայլուն նվաճումների համար պարգևատրվել է «Հայրենիքին մատուցած ծառայությունների համար» 1-ին աստիճանի մեդալով: 1973 թվականին Երևանի «Արարատի» կազմում դարձել է ԽՍՀՄ չեմպիոն և գավաթակիր, 1971 և 1976 թվականներին ակումբի հետ դարձել է արծաթե մեդալակիր։ «Արարատի» կազմում անցկացրել է 295 խաղ՝ դառնալով 67 գոլի հեղինակ։ Հանդես է եկել ԽՍՀՄ պատանեկան, երիտասարդական և օլիմպիական հավաքականներում։ 1992 թվականից Հայաստանի հանրապետության նորաստեղծ Ֆուտբոլի ֆեդերացիայի հիմնադիր անդամ էր, ֆեդերացիայի առաջին նախագահը մինչև 1994 թվականը։
Ղազարյանի հուղարկավորության արարողությունը տեղի կունենա դեկտեմբերի 22-ին` ժամը 13:00-ին: