Փաշինյանը կասկածներ ունի, որ Ալիևը փորձում է չեզոքացնել ԵՄ-ի հովանո ներքո պայմանավորված սկզբունքները
3 րոպեի ընթերցում
ԵՐԵՎԱՆ, 10 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի վարչապետ Նիկոլ Փաշինյանն անդրադարձել է Ադրբեջանի նախագահ Իլհամ Ալիևի առաջարկին Վրաստանը որպես բանակցությունների հարթակ դիտարկելու վերաբերյալ։ Փաշինյանն ընդգծել է, որ հիմա, երբ քննարկվում է Բրյուսելում հանդիպելու հարցը, որտեղ, ըստ էության, շրջանակ կա ընդգծելու, Ադրբեջանը փորձում է այլ հարթակ առաջարկել, ինչը կարող է մեկնաբանվել, որ այլ հարթակ տեղափոխելով՝ ուզում է արդեն իսկ պայմանավորված սկզբունքները չեզոքացնել:
«Արմենպրես»-ի հաղորդմամբ՝ այս մասին ՀՀ վարչապետն ասել է Հանրային հեռուստատեսությանը տված հարցազրույցում:
«Գրանադայում տեղի ունեցավ հանդիպում, և Եվրամիության հարթակում արձանագրվեցին սկզբունքները՝ Հայաստանի և Ադրբեջանի միջև հարաբերությունների կարգավորման՝ մեր և Եվրամիության տեսանկյունից: Հիմա հասկանալի է, որ Բրյուսելում, երբ մենք հանդիպենք, խոսակցությունը պետք է տեղի ունենա այս սկզբունքների շրջանակում, որը, ես չեմ ասի, որ համապատասխանում է միայն Հայաստանի Հանրապետության շահերին: Հայաստանի Հանրապետությունն ընդունել է դա և, իմիջիայլոց, Ադրբեջանն էլ է ընդունել: Եվ հիմա, երբ քննարկում ենք Բրյուսելում հանդիպելու հարցը, որտեղ, ըստ էության, շրջանակ ունենք ընդգծելու, և երբ Ադրբեջանը փորձ է անում այլ հարթակ առաջարկել, դա կարող է մեզ մոտ մեկնաբանվել, որ Ադրբեջանն այլ հարթակ տեղափոխելով՝ ուզում է արդեն իսկ պայմանավորված սկզբունքները չեզոքացնել»,-նշեց Փաշինյանը:
Նրա խոսքով՝ պետք է ամրագրվեն, ստորագրվեն, հայտարարվեն այն սկզբունքները, որոնցով պարզ կլինի, թե ինչ շրջանակում է խոսակցությունն ընթանում և որն է լինելու դրա արդյունքը: Ըստ վարչապետի՝ երբ այդ հարցերի պատասխանը տալու փոխարեն այլ հարթակներ են առաջարկում, ըստ էության, տպավորություն է, որ առաջարկում են այդ սկզբունքները դուրս մղել։
Փաշինյանը հավելեց, որ այն մտավախությունները, թե կարող է այդ գործընթացի թաքնված պլանը լինել այն, որ այդ ամենը կավարտվի ուժի գործադրմամբ՝ նոր պատերազմով, նոր էսկալացիայով, խորանում են:
«Մենք դեմ չենք որևէ խոսակցության, բայց մենք դեմ ենք այն տրամաբանությանը, որը մեզ դուրս կբերի արդեն իսկ պայմանավորված սկզբունքների շրջանակից»,-ընդգծեց Փաշինյանը: