Ակցիայի մասնակիցը ձերբակալվել է ոստիկանի նկատմամբ բռնություն գործադրելու հիմնավոր կասկածանքով
2 րոպեի ընթերցում
![Ակցիայի մասնակիցը ձերբակալվել է ոստիկանի նկատմամբ բռնություն գործադրելու հիմնավոր կասկածանքով](http://armenpress.am/resized/480/static/news/b/2023/09/1120233.jpg)
ԵՐԵՎԱՆ, 21 ՍԵՊՏԵՄԲԵՐԻ, ԱՐՄԵՆՊՐԵՍ: Հաղորդում է ստացվել այն մասին, որ սեպտեմբերի 21-ին բողոքի ակցիա իրականացնող մի խումբ քաղաքացիներ, ժամը 16։25-ի սահմաններում, փակել են Երևան քաղաքի Ամիրյան–Մաշտոց փողոցների խաչմերուկը: Նրանք, չենթարկվելով ոստիկանների օրինական պահանջներին, սկսել են դիմադրել իրավապահներին, հավաքի մասնակիցներից մեկը հարվածել է ոստիկաններից մեկի դեմքի շրջանին՝ պատճառելով մարմնական վնասվածք: «Արմենպրես»-ին այս մասին տեղեկացրին ՀՀ քննչական կոմիտեից։
»Դեպքի առթիվ ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական երրորդ բաժնում նախաձեռնվել է քրեական վարույթ՝ ՀՀ քրեական օրենսգրքի 452-րդ հոդվածի 3-րդ մասով:
Ձեռնարկված միջոցառումների արդյունքում պարզվել է նշված մասնակցի ինքնությունը, ով հանդիսանում է Արագածոտնի մարզի 24-ամյա բնակիչ»,- ասվում է հաղորդագրության մեջ:
Ըստ աղբյուրի՝ նա ներկայացվել է վարույթն իրականացնող մարմնին: Որոշում է կայացվել՝ ոստիկանության ծառայողի նկատմամբ գործադրված ֆիզիկական ներգործության հիմնավոր կասկածանքով նրան ձերբակալելու վերաբերյալ։
Կատարվում է նախաքննություն:
Հանցանքի համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով դատարանի` օրինական ուժի մեջ մտած դատավճռով: