Ակցիայի ընթացքում հակաօրինական արարք թույլ տվող անձինք անխուսափելիորեն ենթարկվելու են պատասխանատվության. ոստիկանություն

ԵՐԵՎԱՆ, 19 ՍԵՊՏԵՄԲԵՐԻ, ԱՐՄԵՆՊՐԵՍ: Հանրապետության հրապարակում զանգվածային ակցիայի ընթացքում հակաիրավական քայլերի դիմող, անկարգություններ հրահրող և իրականացնող, ինչպես նաև ցանկացած հակաօրինական արարք թույլ տվող անձինք անխուսափելիորեն ենթարկվելու են պատասխանատվության։ «Արմենպրես»-ի հաղորդմամբ՝ այս մասին հայտարարել է ՀՀ ՆԳՆ ոստիկանությունը։

«Կրկին անգամ կոչ ենք անում զանգվածային ակցիայի ընթացքում չենթարկվել հնարավոր սադրանքների, հակաիրավական քայլերի դրդող կոչերի ու գործողությունների:

Հորդորում ենք ձեռնպահ մնալ հասարակական կարգի խախտմանն ուղղված ցանկացած քայլից, հակահասարակական և հակաօրինական արարքներից:

ՆԳՆ ոստիկանությունը ողջ ծավալով իրականացնում և իրականացնելու է հասարակական կարգի ապահովմանն ուղղված իր գործառույթները»,- ասվում է ՀՀ ՆԳՆ ոստիկանության հայտարարության մեջ։