ՀՀ ՆԳ նախարարը Լիտվայի և Լատվիայի պատվիրակությունների հետ քննարկել է ԵՄ ծրագրի շրջանակում համագործակցության հարցեր

ԵՐԵՎԱՆ, 18 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ ՆԳ նախարար Վահե Ղազարյանը Եվրամիության կողմից ֆինանսավորվող «Աջակցություն Հայաստանի Հանրապետության իրավապահ մարմինների և անվտանգության ոլորտի բարեփոխումներին» ծրագրի շրջանակներում սեպտեմբերի 18-ին ընդունել է Լիտվայի և Լատվիայի պատվիրակություններին՝ Լիտվայի ոստիկանության գլխավոր կոմիսար-գեներալ Ռենատաս Պոժելայի գլխավորությամբ։

Ինչպես «Արմենպրես»-ին տեղեկացրին ՀՀ ներքին գործերի նախարարությունից, ողջունելով հյուրերին՝ նախարարը բարձր է գնահատել արդեն իսկ ձևավորված բարեկամական և արդյունավետ հարաբերությունները՝ նշելով որ այս հանդիպումը ևս դրա վկայությունն է։

Ըստ աղբյուրի՝ Վահե Ղազարյանը կարևորել է Եվրոպական Միության Համապարփակ և ընդլայնված գործընկերության համաձայնագրի շրջանակներում Լիտվայի և Լատվիայի Հանրապետությունների կողմից իրականացվող «Աջակցություն Հայաստանի Հանրապետության իրավապահ մարմինների և անվտանգության ոլորտի բարեփոխումներին» ծրագիրը, ինչի հիմնական նպատակն է աջակցել ՀՀ ՆԳ նախարարության կազմավորմանն ու ենթակա երեք մարմիններում ընթացող լայնածավալ բարեփոխումներին։

«Վահե Ղազարյանը արձանագրել է, նաև որ ծրագիրը նոր մակարդակի կբարձրացնի նաև երկկողմ ոստիկանական կառույցների միջև փոխգործակցությունը և կնպաստի համագործակցության զարգացմանը և կարողությունների ուժեղացմանը։

Լիտվայի ոստիկանության գլխավոր կոմիսար-գեներալ Ռենատաս Պոժելան և Լատվիայի պետական ոստիկանության պետի տեղակալ Նորմունդս Գռուբիսը շնորհակալություն հայտնելով ջերմ ընդունելության համար՝ ներկայացրել են ծրագրի շրջանակներում արդեն իսկ իրականացված աշխատանքները։ Նրանք պատրաստակամություն են հայտնել շարունակել միջոցառումները, որոնք ուղղված են ՀՀ ներքին գործերի նախարարության կազմավորմանն ու ենթակա ծառայությունների բարեփոխումներին»,- ասվում է հաղորդագրության մեջ։

Ըստ աղբյուրի՝ հանդիպմանը քննարկվել են նաև ինչպես երկկողմ, այնպես էլ Եվրամիության շրջանակներում համագործակցությանը վերաբերող հարցեր։