Ընթանում են ապագա պարեկների օպերատիվ և արագ արձագանքելու հմտությունների զարգացմանն ուղղված վերապատրաստումները

ԵՐԵՎԱՆ, 15 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ ՆԳՆ կրթահամալիրում հանրապետության 4 մարզերում ծառայության անցնելու համար սովորող ապագա պարեկների սցենարային վերապատրաստմանը (SBT) սեպտեմբերի 15-ին հետևել են ՆԳ նախարարի տեղակալ Արփինե Սարգսյանը, Ոստիկանության պետ-ՆԳ նախարարի տեղակալ Արամ Հովհաննիսյանը և ԱՄՆ դեսպանատան թմրամիջոցների դեմ պայքարի և իրավական համագործակցության գրասենյակի (INL) ղեկավար Ալեքսիս Հաֆթվանին։

Ինչպես «Արմենպրես»-ին տեղեկացրին ՀՀ ներքին գործերի նախարարությունից, 5-ամսյա կրթության վերջին փուլում ապագա պարեկները պրակտիկային զուգահեռ անցնում են ստացված գիտելիքները գործնականում կիրառելու պատասխանատու փուլը: Նորարար մոտեցմամբ այս վերապատրաստումներն ապագա պարեկներին հնարավորություն են տալիս ծանոթանալ գործնականում հանդիպող իրավիճակներին` նրանց մոտ զարգացնելով օպերատիվ և արագ արձագանքելու հմտություններ:

«Սցենարների վրա հիմնված վերապաստրաստումները, որոնք Լոռու և Շիրակի մարզերից սկսած դարձել են պարեկների ակադեմիական ուսումնառության պարտադիր բաղադրիչը, տեղի են ունենում 4 հիմնական ուղղություններով՝ հասարակական կարգի խախտումներ, բարձր ռիսկային մեքենաների կանգնեցում, ստանդարտ մեքենաների կանգնեցում, ընտանեկան բռնության դեպքեր, հարևանների միջև վեճեր: Սցենարները իրական կյանքում հանդիպող իրավիճակների հենք ունեն և վերցված են նաև Պարեկային ծառայության գործունեության արդյունքների ուսումնասիրություններից։ Ուսումնական գործընթացի այս բաղադրիչն իրականացվում է ԱՄՆ դեսպանատան թմրամիջոցների դեմ պայքարի և իրավական համագործակցության գրասենյակի (INL) և ICITAP առաքելության հետ սերտ համագործակցության արդյունքում»,- ասվում է հաղորդագրության մեջ։

Ըստ աղբյուրի՝ ՆԳՆ ղեկավարությունն ու ամերիկյան գործընկերները տեղում հետևել են տարբեր բարդ իրավիճակներում պարեկների գործողություններին. մասնավորապես, երբ անձը ալկոհոլի ազդեցության տակ խախտում է հասարակական կարգը, ինչպես են մեքենայից իջեցնում հարբած ու պարեկների պահանջներին չենթարկվող վարորդներին, ինչպես են առգրավում ապօրինի զենքը և թմրանյութը, ինչպես են կանխում հոգեպես անհավասարակշիռ վիճակում գտնվող անձի ինքնասպանության փորձը:

Նշվում է, որ ուսումնական գործընթացն իրականացվում է հայ և ամերիկյան դասախոսների կողմից: Ի տարբերություն նախորդ ակադեմիաների՝ այս ակադեմիայի շրջանակներում մեծ դերակատարումը տրված է հայ վերապատրաստողներին՝ նպատակ ունենալով ամրապնդել կրթահամալիրի ինստիտուցիոնալ կարողությունները հաջորդիվ ակադեմիաների իրականացման շրջանակներում։ Վերապատրաստողների շարքում են նաև գործող պարեկները, որոնք պրակտիկայում բարձր ցուցանիշներ գրանցելու արդյունքում ընդգրկվել են վերապատրաստող դասախոսական անձնակազմ։