2 րոպեի ընթերցում
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ։ Ռուսաստանի նախագահի մամուլի քարտուղար Դմիտրի Պեսկովը հայտարարել է, որ Ռուսաստանը չի պատրաստվում հեռանալ Հարավային Կովկասից։
Ինչպես հաղորդում է «Արմենպրես»-ը, Պեսկովն այս մասին խոսել է՝ արձագանքելով Հայաստանի վարչապետ Նիկոլ Փաշինյանի այն հայտարարությանը, թե տեսնում են, որ Ռուսաստանը իր կողմից ձեռնարկվող կամ չձեռնարկվող քայլերի բերումով ինքն է հեռանում Հարավային Կովկասի տարածաշրջանից։
«Մենք խորը հարգանք ենք տածում վարչապետ Փաշինյանի նկատմամբ, գնահատում ենք նրա և նախագահ Պուտինի աշխատանքային և շատ կառուցողական հարաբերությունները, բայց այդ թեզերի հետ չենք կարող համաձայնվել։ Ռուսաստանը ոչ մի տեղ չի պատրաստվում գնալ։ Ռուսաստանը շարունակում է հետևողական, շատ կարևոր դեր խաղալ իրավիճակի կայունացման և հակամարտության վերացման գործում։ Այս համատեքստում կարևոր է տարածաշրջանի բոլոր պետությունների հանձնառությունը Լեռնային Ղարաբաղի հարցով եռակողմ հայտարարություններին։ Նոր իրադարձություններ են եղել, որոնք որոշակիորեն փոխել են իրավիճակը, սակայն դա չի նշանակում, թե Ռուսաստանը ինչ-որ կերպ շեղվում է իր գործունեությունից»,- ասել է նա։
ՌԴ նախագահի մամուլի քարտուղարի խոսքով՝ Ռուսաստանը շարունակելու է տանել Հարավային Կովկասում, մասնավորապես Լեռնային Ղարաբաղում անվտանգության երաշխավորի դերը։
Պեսկովը նաև նշել է, որ ՌԴ-ում ավելի շատ հայեր են ապրում, քան Հայաստանում, որոնք իրենց ներդրումն ունեն Ռուսաստանի զարգացման գործում։
Նա նաև հիշեցրել է, որ Երևանը մասնակցում է ինտեգրացիոն գործընթացներին, որոնց շնորհիվ «Հայաստանն ԱՊՀ-ում չեմպիոն է դարձել զարգացման տեմպերով»։
