Ոստիկանական գվարդիայի ձևավորման հայեցակարգային ուղղությունների քննարկումները շարունակվում են
2 րոպեի ընթերցում
![Ոստիկանական գվարդիայի ձևավորման հայեցակարգային ուղղությունների քննարկումները շարունակվում են](http://armenpress.am/resized/480/static/news/b/2023/07/1116318.jpg)
ԵՐԵՎԱՆ, 27 ՀՈՒԼԻՍԻ, ԱՐՄԵՆՊՐԵՍ: Երևանում անցկացվել է «Ոստիկանության գվարդիայի մասին» նոր օրենքի մշակման և այլ հարակից իրավական ակտերում փոփոխություններ կատարելու վերաբերյալ հայեցակարգային փաստաթղթին նվիրված բազմաշահառու երկրորդ քննարկումը, որին մասնակցում էր ներքին գործերի նախարարի տեղակալ Արփինե Սարգսյանը։
Ինչպես «Արմենպրես»-ին տեղեկացրին ՀՀ ներքին գործերի նախարարությունից, քննարկմանը մասնակցել են ՆԳՆ ոստիկանության զորքերի, ոստիկանության շտաբի ղեկավար անձնակազմը, ՆԳ նախարարության ոստիկանության բարեփոխումների աշխատանքային խմբի և քաղաքացիական հասարակության ներկայացուցիչներ։
Ըստ աղբյուրի՝ հանդիպման ընթացքում ներկայացվել են ՆԳ նախարարության ռազմավարական նպատակադրումները , մասնավորապես, «Ոստիկանության գվարդիայի մասին» նոր օրենքի ընդունման հայեցակարգային հիմքերը։ Քննարկվել են գործող օրենսդրության ինստիտուցիոնալ և գործառութային խնդիրները, առաջարկվել՝ համապատասխան լուծումներ։ Վերոնշյալ հարցերի շուրջ ծավալվել է ակտիվ քննարկում։ Մասնակիցները քննարկել են հայեցակարգային փաստաթղթի վերաբերյալ այլ առանցքային հարցեր ևս։
Քննարկումը կազմակերպվել էր «Աջակցություն Հայաստանում Մարդու իրավունքների եվրոպական դատարանի վճիռների արդյունավետ կատարմանը» ծրագրի կողմից, որն իրականացվում է Եվրոպայի խորհրդի՝ Հայաստանի համար իրականացվող 2023-2026 թթ. գործողությունների ծրագրի շրջանակներում և ֆինանսավորվում է Մարդու իրավունքների հավատարմագրային հիմնադրամի կողմից։