Թուրքիայի Ադանայի նահանգում 5,5 մագնիտուդ ուժգնությամբ երկրաշարժ է գրանցվել

ԵՐԵՎԱՆ, 25 ՀՈՒԼՍԻ, ԱՐՄԵՆՊՐԵՍ։ Թուրքիայի Ադանա նահանգի Քոզան շրջանում հուլիսի 25-ի առավոտյան 5,5 մագնիտուդ ուժգնությամբ երկրաշարժ է գրանցվել։

Այս մասին, ինչպես հաղորդում է «Արմենպրես»-ը, հայտնում է թուրքական NTV-ն։

Թուրքիայի կառավարությանն առընթեր Արտակարգ իրավիճակների կանխարգելման և հետևանքների վերացման վարչության փոխանցմամբ՝ երկրաշարժի աղբյուրը գտնվել է 11,27 կմ խորության վրա։

Նախնական տեղեկությունների համաձայն՝ երկրաշարժի հետևանքով մարդկային կորուստներ չեն գրանցվել, բայց Քոզանում և հարակից մի քանի շրջաններում, որտեղ նույնպես ցնցումներ են եղել, որոշ շինություններ վնասվել են․ դրանց պատերին ճաքեր են առաջացել։