Հռոմի ստատուտի ընդունումը ծառայելու է Հայաստանի ինքնիշխան տարածքում ադրբեջանական ոտնձգությունները կանխարգելելուն. Արշակյանն արձագանքել է Վորոբյովին

ԵՐԵՎԱՆ, 21 ՀՈՒԼԻՍԻ, ԱՐՄԵՆՊՐԵՍ: Հռոմի ստատուտի ընդունման հարցն ակտիվ քննարկման փուլում է ՀՀ եւ ՌԴ ԱԳՆ փորձագիտական շրջանակներում, եւ այն ոչ մի կերպ ուղղված չի լինի Ռուսաստանի դեմ, այլ կծառայի Հայաստանի ինքնիշխան տարածքում ադրբեջանական ոտնձգությունները կանխարգելելուն: «Արմենպրես»-ի փոխանցմամբ՝ այս մասին հայտարարել է ՀՀ ԱԺ փոխնախագահ Հակոբ Արշակյանն՝ անդրադառնալով ՀՀ ԱԺ եւ ՌԴ ԴԺ միջեւ համագործակցության միջխորհրդարանական հանձնաժողովի 37-րդ նիստի ընթացքում ՌԴ ԴԺԴաշնության խորհրդի նախագահի տեղակալՅուրի Վորոբյովի հնչեցրած մտահոգությանը:

Հայաստանի ԱԺ փոխխոսնակը համոզմունք է հայտնել, որ հարցին անպայման կգտնվի իրավական լուծում, որն ընդունելի կլինի Հայաստանի եւ Ռուսաստանի համար:

Հակոբ Արշակյանը նաեւ ընդգծել է, որ ստատուտի վավերացման գործընթացը սկսվել է շատ ավելի վաղ, քան Միջազգային դատարանի կողմից ՌԴ նախագահի նկատմամբ կայացված որոշումը: Տվյալ հանգամանքը փաստում է, որ գործընթացը ոչ մի կերպ չէր կարող եւ չի կարող ուղղված լինել Ռուսաստանի դեմ:

Ավելի վաղ Յուրի Վորոբյովը հայ խորհրդարանականներին կոչ էր արել ուսումնասիրել Հայաստանի՝ Հռոմի ստատուտին միանալու ռիսկերը: Նա ընդգծել էր, որ դա կվնասի հայ-ռուսական հարաբերություններին:

ՀՀ Սահմանադրական դատարանը 2023 թվականի մարտի 24-ին ճանաչել է սահմանադրությանը համապատասխանող 1998 թվականի հուլիսի 17-ին ստորագրված՝ Միջազգային քրեական դատարանի Հռոմի կանոնադրությունում ամրագրված պարտավորությունները։