Վրաստանի վարչապետը ՌԴ-ի դեմ Թբիլիսիի հնարավոր պատժամիջոցները համարում է դավաճանություն երկրի շահերին
2 րոպեի ընթերցում
ԵՐԵՎԱՆ, 30 ՀՈՒՆԻՍԻ, ԱՐՄԵՆՊՐԵՍ: Տնտեսական պատժամիջոցների սահմանումը Ռուսաստանի դեմ դավաճանություն կլինի Վրաստանի և վրաց ժողովրդի շահերին: Ինչպես «Արմենպրես»-ը տեղեկանում է ТАСС գործակալությունից, այս մասին հայտարարել է հանրապետության վարչապետ Իրակլի Ղարիբաշվիլին՝ խորհրդարանում հանդես գալով կատարված աշխատանքի վերաբերյալ հաշվետվությամբ։
«Այսպես կոչված պատժամիջոցների և ինչ-ինչ սահմանափակումների սահմանումը, առևտրի և տնտեսության փակումը և այլ բաներ, լիովին անպատասխանատու քայլ կլինեին: Դեռ ավելին, դա կարելի է համարել դավաճանություն երկրիդ և ժողովրդիդ շահերին», - ասել է նա:
Կառավարության ղեկավարը մանրամասնել է, որ պատժամիջոցների սահմանումից կտուժեր վրաց ժողովուրդը։
«Եթե ինչ-որ մեկը տուժեր էլ, ապա կտուժեր մեր երկիրը, մեր ժողովուրդը: Մենք չէինք կարող ապրել այսքան համարձակ, չէինք ունենա տնտեսական աճ, զարգացում, աշխատատեղեր», - նշել է նա։
Ղարիբաշվիլին 2022 թվականի փետրվարի 25-ին հայտարարել էր, որ չի նախատեսում պատժամիջոցներ սահմանել Ռուսաստանի դեմ՝ դա պատճառաբանելով ազգային շահերով։ Երկրի իշխանությունները բազմիցս հայտարարել են, որ Ռուսաստանի դեմ պատժամիջոցների սահմանումը ոչ միայն զգալի տնտեսական վնաս կհասցնի Վրաստանին, այլև կարող է ռազմական առճակատում հրահրել: