368.54
ԵՄ-ն սահմանել է Իրանի դեմ պատժամիջոցների 9-րդ փաթեթը
1 րոպեի ընթերցում
ԵՐԵՎԱՆ, 26 ՀՈՒՆԻՍԻ, ԱՐՄԵՆՊՐԵՍ: Եվրամիությունը սահմանել է Իրանի դեմ պատժամիջոցների իններորդ փաթեթը՝ սև ցուցակում ներառելով Իսլամական Հանրապետության 7 պետական պաշտոնյաների՝ «մարդու իրավունքների լուրջ խախտումների համար»։ «Արմենպրես»-ի փոխանցմամբ` այդ մասին ասված է Եվրամիության խորհրդի հրապարակած մամուլի հաղորդագրությունում:
Պատժամիջոցները սահմանվել են 2022-2023 թթ.-ին Իրանում համազգային ցույցերի ընթացքում Իրանի իրավապահ մարմինների կողմից ցուցարարների դեմ ուժի կիրառման, ցուցարարների նկատմամբ մահապատիժ սահմանելու համար:
Պատժամիջոցների ցանկում ներառված են երկու նահանգապետ, դատախազ, դատավորի տեղակալ և ոստիկանության երեք սպա։ ԵՄ-ն կփակի նրանց մուտքն իր տարածք և կսառեցնի նրանց եվրոպական ակտիվները:
ԵՄ-ն նաև Իրանին կոչ է արել վերջ դնել ցուցարարների դեմ մահապատիժ կիրառելու գործելակերպին:
Ըստ մամուլի հաղորդագրության՝ Իրանի դեմ պատժամիջոցների ցանկում այժմ ընդգրկված են 223 ֆիզիկական անձինք և 37 կազմակերպություններ:
Բաժանորդագրվեք մեր ալիքին Telegram-ում