Բերդի ոստիկանները հայտնաբերել են գազալցակայանում թաքցրած թմրանյութը
1 րոպեի ընթերցում
![Բերդի ոստիկանները հայտնաբերել են գազալցակայանում թաքցրած թմրանյութը](http://armenpress.am/resized/480/static/news/b/2023/06/1113296.jpg)
ԵՐԵՎԱՆ, 14 ՀՈՒՆԻՍԻ, ԱՐՄԵՆՊՐԵՍ: Ոստիկանության Տավուշի բաժնի ծառայողները հունիսի 13-ին ստացել են օպերատիվ տեղեկություն, որ Տավուշ-Այգեպար ճանապարհի գազալցակայանի աշխատակիցը տաղավարում պահում և օգտագործում է թմրանյութ:
Ինչպես «Արմենպրես»-ին տեղեկացրին ՀՀ ներքին գործերի նախարարության ոստիկանությունից, Տավուշի բաժնի ծառայողները նույն օրը ձեռնարկել են միջոցառումներ, և գազալցակայանի տաղավարի սեղանի դարակում հայտնաբերել կանեփի տերևներ, նաև` թմրանյութ օգտագործելու միջոցներ:
«Բերդի 36-ամյա բնակիչը հայտնեց, որ տերևներն ինքն է քաղել տաղավարի մոտ աճած թփերից ու դարակում չորացրել` անձամբ օգտագործելու համար:
Կազմված փաստաթղթերն ուղարկվել են Բերդի քննչական բաժին: Հանգամանքները պարզվում են»,- ասվում է հաղորդագրության մեջ:
Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: