Մեդիագրագիտության խթանում՝ մանկապարտեզից․ Վաղարշապատում կայացել է  «Գողացված արևը» ներկայացման առաջնախաղը

ԵՐԵՎԱՆ, 13 ՀՈՒՆԻՍԻ, ԱՐՄԵՆՊՐԵՍ: Վաղարշապատի թիվ 11 մանկապարտեզ հունիս 13-ին այցելել էին Կորնեյ Չուկովսկու «Գողացված արևը» հեքիաթի հերոսները, որոնք երեխաներին սովորեցնում էին, որ թվային հարթակներում նորություններ լսելիս և լուրեր տարածելիս պետք է զգույշ լինել, քանի որ մեծ է ապատեղեկատվության վտանգը։

Ինչպես «Արմենպրես»-ին տեղեկացրին «Հանրային լրագրության ակումբ» հասարակական կազմակերպությունից (ՀԼԱ), առաջին անգամ ցուցադրվող «Գողացված արևը» ներկայացումը նախաձեռնել էր Հանրային լրագրության ակումբը՝ ԱՄՆ պետքարտուղարության ֆինանսավորմամբ իրականացվող«Մեդիա և տեղեկատվական գրագիտությունը նախադպրոցական կրթության մեջ»ծրագրի շրջանակում։ Ծրագրի գործընկերներն են՝«Քայլ առ քայլ» հիմնադրամը,«Թիչինգ Ըքադեմի»-ն, «Հեքիաթերեն» ինտերակտիվ թատրոնը։

«Անտառում տարածված լուրը, թե կոկորդիլոսը «կուլ է տվել» արևը, խառնաշփոթ է առաջացնում անտառային բնակիչների և մանկապարտեզի երեխաների շրջանում։ Ո՞ւր է անհետացել լույսը, ո՞վ է մեղավոր, ի՞նչպես կարելի է պարզել ճշմարտությունը․ այս հարցերի պատասխանները երեխաները բացահայտում են միասին ներկայացման ողջ ընթացքում։ Անտառային լրատվամիջոցներով շրջանառվող ապատեղեկատվության հետքերով՝ երեխաներն իրականացնում եմ փոքրիկ հետաքննություն և փորձում պարզել իրողությունը։ Սցենարային և խաղարկայնացված դատն օգնում է լսել բոլոր կողմերին, դիտարկել փաստերը, համադրել ու կայացնել վճիռ։ Իհարկե, ինչպես բոլոր հեքիաթներում, այստեղ ևս բարին հաղթում է չարին՝ ճշմարտությունը սփռվում է անտառով մեկ, իսկ երեխաներն իրենց ներգրավվածությամբ դառնում են դրա մի մասը»,- ասվում է հաղորդագրության մեջ։

Ըստ աղբյուրի՝ ներկայացումից հետո մանկապարտեզի դաստիարակների և տնօրենի հետ անցկացվել է քննարկում՝ կարծիքների փոխանակման, մեդիագրագիտության կարողությունների զարգացմանն ուղղված գործիքների կիրառման վերաբերյալ։

«Այս ձևաչափն ու թեմատիկ ուղղությունն այլևս կրթական նոր չափորոշչային համակարգի անբաժան մաս է համարվում (ՀՊՉ 5): Շատ կարևոր է, որպեսզի նախակրթական հաստատություններն այս ուղղությամբ աշխատեն ոչ միայն երեխաների հետ, այլև ծնողների՝ զրույցների, քննարկումների և ինտերակտիվ այլ ձևաչափերի կիրառմամբ։ Վաղ մանկության տարիքից երեխաների զինումը թվային գրագիտությամբ ժամանակակից աշխարհի մարտահրավերն է, որն էլ փորձում ենք հաղթահարել միասին՝ կառուցելով ապատեղեկատվությանը դիմակայուն հասարակություն»,- նշել է ՀԼԱ ծրագրերի ղեկավար Ալեքսանդր Մարտիրոսյանը։

Նշվում է, որ ծրագրի շրջանակում նախատեսվում է «Գողացված արևը» ներկայացումը ցուցադրել Հայաստանի այլ մարզերում ևս։

«Մեդիա և տեղեկատվական գրագիտությունը նախադպրոցական կրթության մեջ»ծրագրի նպատակն է մանկավարժներին զինել մեդիա և տեղեկատվական գրագիտության գիտելիքներով և հմտություններով, բարձրացնել նրանց թվային անվտանգության կարողությունները, օգնել առավել լավ հասկանալ անձնական տվյալների պաշտպանության կարևորությունն ու մեխանիզմները։