ՀՀ ԿԳՄՍ նախարարության պատվիրակությունը Լատվիայում ուսումնասիրում է երիտասարդության հարցերի ոլորտի փորձը

ԵՐԵՎԱՆ, 24 ՄԱՅԻՍԻ, ԱՐՄԵՆՊՐԵՍ: ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանի գլխավորած պատվիրակությունը պաշտոնական այցով գտնվում է Լատվիայի Հանրապետությունում:

Ինչպես «Արմենպրես»-ին տեղեկացրին ՀՀ կրթության, գիտության, մշակույթի և սպորտի նախարարությունից, այցի նպատակն է ՀՀ երիտասարդների կարիքներից բխող և միջազգային չափանիշներին համապատասխանող «Երիտասարդության մասին» օրենքի նախագիծ մշակելու համար ուսումնասիրել Լատվիայի Հանրապետության՝ Հայաստանի հետ տնտեսական, սոցիալական, դեմոգրաֆիկ ցուցանիշներով և մի շարք միջազգային ինդեքսներով համադրելի երկրի երիտասարդական քաղաքականությունը, ոլորտային օրենսդրությունը և փորձառությունը։

Պատվիրակության կազմում են ՀՀ ԿԳՄՍՆ երիտասարդական քաղաքականության, լրացուցիչ և շարունակական կրթության վարչության պետ Զարա Ասլանյանը, Իրավաբանական վարչության պետի տեղակալ Հակոբ Քնաջյանը, Ազգային ժողովի և Միավորված ազգերի կազմակերպության Մանկական հիմնադրամի (ՅՈՒՆԻՍԵՖ) և Բնակչության հիմնադրամի հայաստանյան գրասենյակի ներկայացուցիչներ։

Ըստ աղբյուրի՝ այցի ընթացքում կայացել են հանդիպումներ հյուրընկալող երկրի երիտասարդական պետական քաղաքականություն մշակող կառույցների, ազգային հովանոց կառույցների, քաղաքացիական հասարակության հատվածի, ինչպես նաև տեղական և ազգային մակարդակով գործող երիտասարդական կենտրոնների և երիտասարդության ոլորտի հետազոտական կազմակերպություններ ներկայացուցիչների հետ։

«ԿԳՄՍ նախարարի տեղակալ Արթուր Մարտիրոսյանը հանդիպել է Լատվիայի Հանրապետության կրթության և գիտության նախարարության պետքարտուղարի տեղակալ Իլզե Սալենիեցեին: Հանդիպմանը ներկա են եղել նաև նախարարության Երիտասարդական քաղաքականության գծով ղեկավարի տեղակալ Ռանդա Կենգեն, Լատվիայի Հանրապետության ազգային երիտասարդական խորհրդի ծրագրերի համակարգող Ռոտա Լացեն և Երիտասարդական միջազգային ծրագրերի գործակալության Երիտասարդական քաղաքականության աջակցման վարչության ղեկավար Նիլս Մոսեյոնոկսը։

Կողմերն անդրադարձել են օրենսդրության ոլորտում լատվիական փորձին, երիտասարդական ենթակառուցվածքների գործունեությանը, պետություն-քաղաքացիական հասարակություն կապին, երիտասարդների կյանքի որակի վրա պետական քաղաքականության ազդեցությանը, ինչպես նաև երիտասարդական քաղաքականության դիրքերից խաչվող ոլորտային քաղաքականությունների մոնիթորինգի իրականացմանը»,- ասվում է հաղորդագրության մեջ:

Նշվում է, որ քննարկվել են նաև կրթության, գիտության, մշակույթի և սպորտի ոլորտներում հայ–լատվիական համագործակցության հնարավոր ուղիները: Անդրադարձ է եղել «Էրազմուս+» և Եվրոպական միության կողմից ֆինանսավորվող մի այլ շարք ծրագրերի շրջանակում համագործակցությանը: Նմանօրինակ ծրագրեր կարող են իրականացվել նաև երկկողմ ձևաչափով։