Շուրջ 300 աշակերտ կօգտվի առողջարար ու տաք սննդից․ Աշտարակի թիվ 4 դպրոցում մեկնարկեց «Տաք սնունդ» ծրագիրը
3 րոպեի ընթերցում
![Շուրջ 300 աշակերտ կօգտվի առողջարար ու տաք սննդից․ Աշտարակի թիվ 4 դպրոցում մեկնարկեց «Տաք սնունդ» ծրագիրը](http://armenpress.am/resized/480/static/news/b/2023/05/1111510.jpg)
ԵՐԵՎԱՆ, 22 ՄԱՅԻՍԻ, ԱՐՄԵՆՊՐԵՍ: Աշտարակի Գրիգոր Ղափանցյանի անվան թիվ 4 հիմնական դպրոցի 1-4-րդ դասարանների շուրջ 300 աշակերտներ այսուհետ հնարավորություն կունենան ողջ ուսումնական տարվա ընթացքում օգտվելու առողջարար ու տաք սննդից։
Ինչպես «Արմենպրես»-ին տեղեկացրին Արագածոտնի մարզպետարանի աշխատակազմից, դպրոցում ծրագիրն սկսելու համար նախևառաջ անհրաժեշտ էր մեծ ու հարմարավետ ճաշարան և խոհանոց, որի ստեղծումը հնարավոր է դարձել Արագածոտնի մարզպետ Սերգեյ Մովսիսյանի որոշմամբ․ դպրոցի ճաշարանը և խոհանոցը հիմնանորոգելու համար մարզպետի աշխատակազմը շուրջ 4 մլն դրամ է հատկացրել։
«Դպրոցում ծրագիրն իրականացվել է նաև ՄԱԿ-ի «Պարենի համաշխարհային ծրագրի», ԿԳՄՍ նախարարության «ԿԶՆԱԿ» հիմնադրամի «Դպրոցական սնունդ և երեխաների բարեկեցություն» հիմնարկի գործուն աջակցությամբ։
Այսօր տեղի ունեցավ ճաշարանի բացումը, մատուցվեց առաջին տաք սնունդը, որից, բացի աշակերտներից, օգտվեցին նաև միջոցառմանը հրավիրված հյուրերը։
Այսպիսով, ճաշարանի կարմիր ժապավենը կտրելու հանդիսավոր արարողությանը ներկա էին Արագածոտնի մարզպետի աշխատակազմի, «ԿԶՆԱԿ» հիմնադրամի «Դպրոցական սնունդ և երեխաների բարեկեցություն» հիմնարկի ղեկավար կազմի ներկայացուցիչներ, դպրոցի տնօրինությունը, աշակերտներ ու հյուրեր։
Ուշագրավ է, որ ճաշարանի պատերին աշակերտներին ծանոթ հեքիաթների հերոսների նկարազարդումներ են, ինչն ավելի հաճելի կդարձնի ճաշարանում նրանց ընդմիջումը»,- ասվում է հաղորդագրության մեջ։
Ըստ աղբյուրի՝ առողջ սնունդը համտեսելուց հետո դպրոցականները վայելել են «Ճամփորդություն առողջ սննդի տիեզերքում» ինտերակտիվ ներկայացումը, որի գլխավոր ուղերձը առողջ սննդի, ֆիզիկական ակտիվության մեծ կարևորության ու վնասակար ուտելիքներից հրաժարվելու անհրաժեշտության մասին էր։
Նշվում է, որ ողջույնի խոսքում Արագածոտնի մարզպետի խորհրդական Արմեն Գրիգորյանը, շնորհավորելով շահառուներին, նշել է, որ կրտսեր դասարանների աշակերտների առողջ սնուցումն ապահովելու, նրանց մոտ առողջ սնվելու, առողջ ապրելակերպի մշակույթը դպրոցից արմատավորելու նպատակով է իրականացվում «Կայուն դպրոցական սնունդ» ծրագիրը, որին սահուն կերպով ինտեգրվել է Արագածոտնի ևս մեկ դպրոց։ Նրա խոսքով՝ այսօրվանից, շուրջ 300 աշակերտ հնարավորություն է ստանում սննդաբանների կողմից նախապես մշակված սննդակարգով օգտվել բարձրորակ սննդից։