2 րոպեի ընթերցում
ԵՐԵՎԱՆ, 12 ՄԱՅԻՍԻ, ԱՐՄԵՆՊՐԵՍ: Հայաստանի պատվիրակությունը՝ Ռուսաստանում Հայաստանի Հանրապետության արտակարգ և լիազոր դեսպան Վաղարշակ Հարությունյանի գլխավորությամբ, հանդիպել է Սվերդլովսկի մարզի օրենսդիր ժողովի նախագահ Լյուդմիլա Բաբուշկինայի հետ։ «Արմենպրես»-ի փոխանցմամբ՝ այդ մասին հաղորդում է մարզային օրենսդիր ժողովի մամուլի ծառայությունը։
«Սա մեր առաջին հանդիպումն է: Հուսով եմ, որ այն մեկնարկ կտա երկարաժամկետ համագործակցությանը: Մենք պատրաստ ենք Հայաստանի Հանրապետությունից խորհրդարանականների պատվիրակություն հրավիրել մեզ մոտ: Մենք կարող ենք շատ հարցեր քննարկել, կուտակված փորձի փոխանակում անցկացնել օրինաստեղծման, սոցիալ-տնտեսական զարգացման ոլորտում»,- նշել է Բաբուշկինան։
Նա հիշեցրել է, որ հուլիսին Միջին Ուրալում տեղի կունենա «Իննոպրոմ-2023» միջազգային արդյունաբերական ցուցահանդեսը, որին մասնակցությունը հետաքրքիր կլինի օտարերկրյա գործընկերների համար»։
Մամուլի ծառայությունում հավելել են, որ Հարությունյանն ընդգծել է Ռուսաստանի Դաշնության տարածաշրջանների հետ համագործակցության հետագա զարգացման կարևորությունը և միջխորհրդարանական շփումների շրջանակներում փոխգործակցության կազմակերպման պատրաստակամություն է հայտնել։
Հայաստանի Հանրապետության պատվիրակության համար էքսկուրսիա է կազմակերպվել մարզային խորհրդարանի շենքում։ Հյուրերն այցելել են Սվերդլովսկի մարզի Օրենսդիր ժողովի թանգարան և դիտել «Սվերդլովսկի մարզի մունիցիպալ կազմավորումների պաշտոնական խորհրդանիշների» ցուցադրությունը։
Միջոցառմանը մասնակցել են նաև Սվերդլովսկի մարզի օրենսդիր ժողովի փոխնախագահ Վիկտոր Յակիմովը, տարածաշրջանային քաղաքականության և տեղական ինքնակառավարման զարգացման հանձնաժողովի նախագահ Միխայիլ Զուբարևը և Օրենսդիր ժողովի միջխորհրդարանական գործունեության հանձնաժողովի նախագահ Վյաչեսլավ Վեգները։
Մայիսի 11-ից մայիսի 16-ը Միջին Ուրալում միջոցառումներ են անցկացվում Հայաստանի օրերի շրջանակներում։