Հանցագործության հետքերը թաքցնելու նպատակով դիակը գցել էին ջրափոսը․ ոստիկանները բացահայտել են սպանությունը
2 րոպեի ընթերցում
![Հանցագործության հետքերը թաքցնելու նպատակով դիակը գցել էին ջրափոսը․ ոստիկանները բացահայտել են սպանությունը](http://armenpress.am/resized/480/static/news/b/2023/05/1110626.jpg)
ԵՐԵՎԱՆ, 10 ՄԱՅԻՍԻ, ԱՐՄԵՆՊՐԵՍ: Ոստիկանության Մուշի բաժնի ծառայողին մայիսի 5-ին, ժամը 09.00-ի սահմաններում, զանգահարած քաղաքացին հայտնել էր, որ Գյումրու Իսահակյան փողոցի շենքերից մեկի մոտակայքում դիակ կա:
Ինչպես «Արմենպրես»-ին տեղեկացրին ՀՀ ներքին գործերի նախարարության ոստիկանությունից, նշված վայր մեկնած օպերատիվ խումբը ջրափոսում հայտնաբերել է նույն փողոցի 54-ամյա բնակիչ Աշոտ Ավագյանի դիակը՝ բերանքսիվայր ընկած, դեմքի վնասվածքով:
«Շիրակի մարզային քննչական վարչությունում սպանության հատկանիշներով նախաձեռնվել է քրեական վարույթ:
ՆԳՆ ոստիկանության ՔՈԳՎ, Շիրակի մարզային վարչության, Մուշի և Կումայրիի բաժինների ծառայողների համատեղ ձեռնարկած օպերատիվ-հետախուզական միջոցառումների, ինչպես նաև քննչական գործողությունների արդյունքում պարզվել է, որ մայիսի 4-ին նախկինում դատված գյումրեցի 44-ամյա տղամարդը Գոգոլի փողոցի իր տանը ոգելից խմիչքի ազդեցության տակ ոտքերով ու ձեռքերով հարվածներ է հասցրել Աշոտ Ավագյանին, ինչի հետևանքով նա մահացել է: Այնուհետև հանցագործության հետքերը թաքցնելու նպատակով 46-ամյա համաքաղաքացու հետ դիակը տեղափոխել և գցել են ջրափոսը: 44-ամյա և 46-ամյա տղամարդիկ կալանավորվել են»,- ասվում է հաղորդագրության մեջ:
Ըստ աղբյուրի՝ քրեական վարույթը շարունակվում է Շիրակի մարզային քննչական վարչությունում:
Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: