Վլադիկավկազ-Լարս ճանապարհը փակ է մեծ բեռնատարների համար

ԵՐԵՎԱՆ, 11 ԱՊՐԻԼԻ, ԱՐՄԵՆՊՐԵՍ: Ռազմավիրական ճանապարհով երթևեկությունը մեծ բեռնատարների համար արգելվել է՝ վատ եղանակի պատճառով: «Արմենպրես»-ի փոխանցմամբ՝ այս մասին այսօր հայտնել են ՌԴ արտակարգ իրավիճակների նախարարության Հյուսիսային Օսիայի Գլխավոր վարչության մամուլի ծառայությունում։

«Վրաստանի տարածքում եղանակային պայմանների վատթարացման, ավտոտրանսպորտային միջոցների անվտանգ երթևեկությունն ապահովելու անհնարինության պատճառով, ինչպես նաև հաշվի առնելով Վրաստանի սահմանապահ ոստիկանության հանձնարարականները՝ 2023 թվականի ապրիլի 11-ի ժամը 00:20-ից (Երևանի ժամանակով 01:20-ից) արգելված է մեծաբեռնատար տրանսպորտային միջոցների երթևեկությունը Վլադիկավկազ-Լարս հատվածում՝ Ռուսաստանի Դաշնությունից ելքի ուղղությամբ», - մեջբերում է ТАСС-ը գերատեսչության տարածած հաղորդագրությունից:

Նշվում է, որ ճանապարհը կբացվի հատուկ կարգադրությամբ։

Ռազմավիրական ճանապարհը Վլադիկավկազից տանում է Թբիլիսի Գլխավոր Կովկասյան լեռնաշղթայով՝ Ռուսաստանը կապելով Վրաստանի և Անդրկովկասի մյուս երկրների հետ։ «Կազբեկ-Վերին Լարս»-ը վրաց-ռուսական սահմանի միակ գործող անցակետն է։ Ռուսական հատվածում երթուղին անցնում է Հյուսիսային Օսիայի տարածքով։ Ձմռանը ճանապարհը հաճախ փակվում է վատ եղանակի պատճառով: