3 րոպեի ընթերցում
ԵՐԵՎԱՆ, 14 ՄԱՐՏԻ, ԱՐՄԵՆՊՐԵՍ: Առողջապահության համաշխարհային կազմակերպության (ԱՀԿ) գլխավոր տնօրեն Թեդրոս Ադհանոմ Գեբրեյեսուսը վստահ է, որ 2023 թ.-ին COVID-19-ի համավարակը կավարտվի, և այս հիվանդության պատճառով հայտարարված միջազգային արտակարգ իրավիճակը կվերացվի։ «Արմենպրես»-ի փոխանցմամբ՝ Գեբրեյեսուսը նման հայտարարություն է արել Թոմաս Ֆրենսիս կրտսերի մեդալով պարգևատրման արարողության ժամանակ: ԱՀԿ-ի ղեկավարը նման մեդալի է արժանացել առողջապահության ոլորտում ունեցած ավանդի համար։
«Վստահ եմ, որ մինչև այս տարվա վերջ մենք կկարողանանք ասել, որ COVID-19-ն ավարտվել է որպես հանրային առողջապահության ոլորտում միջազգային մտահոգության արժանի արտակարգ իրավիճակ և որպես համավարակ», - ասել է Գեբրեյեսուսը:
Նա հիշեցրել է, որ մարտի 11-ին լրացավ ուղիղ երեք տարին «այն պահից, երբ ԱՀԿ-ն առաջին անգամ հայտարարեց, որ COVID-19-ի համաշխարհային բռնկումը կարելի է բնութագրել որպես համավարակ»։
«Այժմ մենք, անշուշտ, շատ ավելի լավ վիճակում ենք, քան երբևէ համաճարակի ժամանակ», - ասել է ԱՀԿ-ի գլխավոր տնօրենը:
Նա ուշադրություն է հրավիրել այն փաստի վրա, որ «առաջին անգամ շաբաթական գրանցված մահերի թիվն այժմ ավելի քիչ է», քան այն ժամանակ, երբ ԱՀԿ-ն առաջին անգամ օգտագործեց «համավարակ» բառը՝ բնութագրելով SARS-CoV-2-ի տարածումը:
ԱՀԿ-ի ղեկավարը շեշտել է, որ հարկավոր է ազնվորեն գնահատել համավարակը և դրանից դասեր քաղել, «որպեսզի այլևս չկրկնեն նույն սխալները»:
Համավարակի «դասերի» թվում, Գեբրեյեսուսն անվանել է առաջին հերթին ամուր հանրային առողջապահական համակարգը՝ կոչ անելով բոլոր երկրներին ներդրումներ անել այդ ոլորտում:
Երկրորդ դասը գիտության կարևորությունն է: ԱՀԿ-ի ղեկավարը շեշտել է, որ համավարակի ողջ ընթացքում գիտությունը մարդկանց տրամադրել է գործիքներ՝ հասկանալու, թե ինչպես է վիրուսը տարածվում և ինչպես կանգնեցնել այն:
Իսկ երրորդ դասն, ըստ Գեբրեյեսուսի, համագործակցությունն է: Ըստ նրա՝ կորոնավիրուսի համավարակի ընթացքում կար համագործակցության և համակարգման պակաս, քանի որ պետությունները չէին կարողանում համահունչ գլոբալ արձագանք ձևավորել: