Վրաստանի կառավարությունն ուկրաինացիներին թույլ չի տա երկրում երկրորդ ռազմաճակատ բացել. Ղարիբաշվիլի

ԵՐԵՎԱՆ, 13 ՄԱՐՏԻ, ԱՐՄԵՆՊՐԵՍ: «Վրացական երազանք» իշխող կուսակցությունը թույլ չի տա երկրում երկրորդ ռազմաճակատի բացում: Նման հայտարարություն է արել երկրի վարչապետ Իրակլի Ղարիբաշվիլին «Իմեդիե» հեռուստաընկերությանը տված հարցազրույցում։

Այդ մասին «Արմենպրես»-ը տեղեկանում Է РИА Новости գործակալությունից: «Ես գիտեմ, որ Ուկրաինայից մի քանի տասնյակ մարդ Է եկել: Ցանկանում եմ դիմել նրանց՝ պատրանքներ ու ակնկալիքներ չունենաք, թե այստեղ ինչ-որ բան տեղի կունենա։ Ցանկանում եմ մաղթել, որ Ուկրաինայում բոլոր մարտիկներն առողջ վերադառնան իրենց ընտանիքներ, բայց ձեզ կոչ եմ անում՝ մի՛ ենթարկվեք կեղտոտ սադրանքներին:

Մենք գիտենք շատ ավելին, քան նրանք կարող են պատկերացնել: Պետությունն այսօր գտնվում Է ամենաբարձր մակարդակի վրա... Քանի դեռ իշխանության գլուխ է կանգնած «Վրացական երազանքը», մենք երկրորդ ճակատ թույլ չենք տա, դա բացառվում է», - ասել Է նա։ Մարտի 10-ին Վրաստանի խորհրդարանի փոխխոսնակ Գիա Վոլսկին հայտնել էր, որ երկիր են ժամանել նախկին նախագահ Միխեիլ Սաակաշվիլիի մի խումբ կողմնակիցներ, որոնք կռվել են Ուկրաինայի զինված ուժերի շարքերում։ Վոլսկիի խոսքով՝ նրանց նպատակն Է օրակարգից չհանել հեղափոխական գործընթացը: Վրաստանի վարչապետը նաև անընդունելի է համարել զինվորականների մասնակցությունը ցույցերին և հորդորել Է չփորձել Վրաստանում անկարգություններ հրահրել։

Թբիլիսիում մարտի 7-ից տեղի են ունեցել բողոքի ցույցեր։ Ցուցարարներին ցրելու համար ուժայինները ջրցան մեքենաներ են գործի դրել և արցունքաբեր գազ կիրառել։ Բախումներն սկսվել էին օտարերկրյա գործակալների մասին օրինագծի պատճառով, որի ընդունմանը հետագայում խորհրդարանը դեմ Է քվեարկել:

Այդուհանդերձ, իրադրությունը մնում է լարված։ Ըստ РИА Новости-ի՝ որոշ ցուցարարներ երգել են Ուկրաինայի հիմնը և պատրաստակամություն հայտնել «Վրաստանի կազմ վերադարձնել Աբխազիան և Հարավային Օսիան»։ «Օտարերկրյա ազդեցության թափանցիկության մասին» օրինագիծը ենթադրում է ստեղծել այն հասարակական կազմակերպությունների, լրատվամիջոցների և սուբյեկտների գրանցամատյանը, որոնք ֆինանսավորում են ստանում արտերկրից:

Օրինագծի նախաձեռնողները հավաստիացնում Էին, թե դա ԱՄՆ-ում գործող նմանատիպ օրենքի մեղմացված տարբերակն է, սակայն ընդդիմությունը և Վրաստանում ԱՄՆ դեսպան Քելի Դեգնանը պնդում են, որ փաստաթուղթն ամերիկյան օրենքի հետ ոչ մի ընդհանուր բան չունի։ Նրանց կարծիքով՝ ներկայացված օրինագիծը կրկնում է օտարերկրյա գործակալների մասին ՌԴ օրենսդրության հիմնական դրույթները: