Իրանը հայտարարել է, որ Գրոսիի այցի ընթացքում ՄԱԳԱՏԷ-ի հետ փոխըմբռնում է ձեռք բերվել

ԵՐԵՎԱՆ, 6 ՄԱՐՏԻ, ԱՐՄԵՆՊՐԵՍ: Իրանը և Ատոմային էներգիայի միջազգային գործակալությունը (ՄԱԳԱՏԷ) փոխըմբռնման են հասել կազմակերպության ղեկավար Ռաֆայել Գրոսիի՝ Թեհրան կատարած այցի ընթացքում, այսօր հայտարարել է Իրանի արտաքին գործերի նախարարության (ԱԳՆ) պաշտոնական ներկայացուցիչ Նասեր Քանաանի Չաֆին։ Այս մասին «Արմենպրես»-ը տեղեկանում Է ТАСС գործակալությունից:

«ՄԱԳԱՏԷ-ի գլխավոր տնօրենի այցը Թեհրան դարձավ դիվանագիտության շարունակությունը տեխնիկական տարաձայնությունների լուծման համար, - մեջբերում է նրա խոսքը Tasnim գործակալությունը:- «Արդյունքում Իրանի և ՄԱԳԱՏԷ-ի միջև փոխըմբռնում է ձեռք բերվել»:

Թե կոնկրետ որ ոլորտում է փոխհամաձայնություն ձեռք բերվել, ԱԳՆ ներկայացուցիչը մանրամասներ չի հայտնել։ Ընդ որում, նա ընդգծել է, որ Իսլամական Հանրապետությունը «դիվանագիտությունը համարում է վեճերը երկկողմ և բազմակողմ կարգով կարգավորելու լավագույն միջոցը»։

Իրանի արտաքին գործերի նախարարության խոսնակը նշել է, որ «Իրանը... գերադասում է հետևել բանակցությունների ուղուն՝ բոլոր կողմերին, այդ թվում՝ ԱՄՆ վարչակազմին միջուկային համաձայնագրով ստանձնած պարտավորությունների կատարմանը վերադարձնելու համար»։ Գրոսին Թեհրան է ժամանել մարտի 3-ին։

Իրանի մայրաքաղաքում գտնվելու ընթացքում նա բանակցությունների երկու փուլ է անցկացրել Իրանի Ատոմային էներգիայի կազմակերպության (ԻԱԷԿ) ղեկավար Մոհամմադ Էսլամիի հետ և հանդիպել Իրանի արտգործնախարար Հոսեյն Ամիր Աբդոլլահիանի հետ։

Մարտի 3-ին կայացել են Գրոսիի բանակցությունները հանրապետության նախագահ Էբրահիմ Ռայիսիի հետ։ Հանդիպմանը գործակալության ղեկավարը գոհունակություն է հայտնել այցի ընթացքում մշակված համատեղ միջոցառումներից, որոնք, նրա խոսքով, ենթադրում են համագործակցության հաստատում Իսլամական Հանրապետության և ՄԱԳԱՏԷ-ի միջև։

Մարտի 4-ին ՄԱԳԱՏԷ-ի և ԻԱԷԿ-ի կողմից այցի արդյունքների վերաբերյալ հրապարակված համատեղ հայտարարության մեջ նշվել են գործակալությանը ստուգման և մոնիտորինգի գործողություններ իրականացնել թույլ տալու՝ Իրանի մտադրությունը, ինչպես նաև երեք միջուկային օբյեկտներ հասանելիություն ապահովելու՝ Թեհրանի պատրաստակամությունը:

Նշվել է, որ կողմերը պայմանավորվել են փոխգործակցել՝ ելնելով հանրապետության «իրավունքներից ու պարտականություններից» և գործակալության իրավասություններից: Նույն օրը Վիեննայում կայացած մամուլի ասուլիսում Գրոսին դրական է պատասխանել լրագրողների այն հարցին, թե Իրանը պատրաստ է արդյոք տեսախցիկներ և այլ սարքավորումներ տեղակայել միջուկային օբյեկտների մոնիտորինգի համար։

Սակայն մարտի 5-ին ԻԱԷԿ-ի խոսնակ Բեհրուզ Քամալվանդին IRNA գործակալությանը տված մեկնաբանությունում հերքել էր Գրոսիի այդ հայտարարությունը և ընդգծել, որ իրանական միջուկային օբյեկտներում նոր տեսախցիկների տեղակայման հարցը չի քննարկվել ՄԱԳԱՏԷ-ի ղեկավարի՝ Թեհրան կատարած այցի ընթացքում: