Դուբայում անցկացվող «Classic Winds» մրցույթի մասնակիցները եզրափակիչ փուլում հանդես են գալիս Հայաստանի պետական սիմֆոնիկ նվագախմբի նվագակցությամբ
2 րոպեի ընթերցում
ԵՐԵՎԱՆ, 1 ՄԱՐՏԻ, ԱՐՄԵՆՊՐԵՍ: Հայաստանի պետական սիմֆոնիկ նվագախումբը՝ գեղարվեստական ղեկավար և գլխավոր դիրիժոր Սերգեյ Սմբատյանի ղեկավարությամբ, փետրվարի 26-ից մարտի 1-ը ներկայանում է Դուբայում «Inclassica» միջազգային երաժշտական փառատոնի շրջանակում անցկացվող «Classic Winds» միջազգային մրցույթին որպես պաշտոնական նվագախումբ։ Մրցույթի չորրորդ` եզրափակիչ փուլում աշխարհի տարբեր ծայրերից ժամանած երաժիշտներ ժյուրիի առջև հանդես են գալիս Հայաստանի պետական սիմֆոնիկ նվագախմբի նվագակցությամբ։
Ինչպես «Արմենպրես»-ը տեղեկանում է Սիմֆոնիկ նվագախմբի տարածած հաղորդագրությունից, երաժշտական այս ստուգատեսը նպատակ ունի բացահայտելու տաղանդավոր երիտասարդ ֆլեյտահարների, կլարնետահարների, սաքսոֆոնահարների և հոբոյահարների։
Մրցույթը կազմակերպվել է «SAMIT Event Group»-ի կողմից։ Մրցույթի ռեզիդենտ կոմպոզիտորն է Ալեքսեյ Շորը։
«Inclassica» միջազգային երաժշտական փառատոնի շրջանակներում, որը համախմբում է աշխարհի լավագույն երաժիշտներին, առանձին համերգով նշվել է հայ մեծ կոմպոզիտոր Արամ Խաչատրյանի ծննդյան 120-ամյակը։ Փետրվարի 16-ին Ուզբեկստանի ազգային սիմֆոնիկ նվագախմբի կատարմամբ հնչել են Արամ Խաչատրյանի ստեղծագործությունները՝ Վալսը «Դիմակահանդես» դրամայի երաժշտությունից, հատված «Գայանե» բալետից, ինչպես նաև Խաչատրյանի Ջութակի կոնցերտը՝ ղազախ ջութակահարուհի Այման Մուսախաջաևայի կատարմամբ։