ԵՐԵՎԱՆ, 26 ԴԵԿՏԵՄԲԵՐԻ, ԱՐՄԵՆՊՐԵՍ: Միջազգային տարբեր փառատոնների մասնակցություն, ավելի քան 100 մրցանակ ու բազմաթիվ հաղթանակներ. Գ. Սունդուկյանի անվան ազգային ակադեմիական թատրոնի «Black box»-ում ամփոփվեց ՀՀ կրթության, գիտության, մշակույթի և սպորտի նախարարության «Երեխաների հատուկ ստեղծագործական կենտրոն» ՊՈԱԿ-ի 2022 թվականի ընթացքում կատարած աշխատանքներն ու իրականացրած ծրագրերը:
«Արմենպրես»-ի հաղորդմամբ՝ ՊՈԱԿ-ի գլխավոր նպատակը հաշմանդամություն, դաունի համախտանիշ և այլ յուրահատկություն ունեցողներին հասարակությունում ինտեգրելն է:
ՀՀ ԿԳՄՍ նախարարի տեղակալ Արա Խզմալյանը նշեց՝ կառույցի աշխատանքն ուղղակիորեն բխում է մշակույթի և կրթության ոլորտի պետական քաղաքականության առաջնահերթություններից: Պահպանվել է ներառականության մշակույթի ապակենտրոնացման սկզբունքը: Փոխնախարարը կարևորեց, որ որոշ նախագծեր իրականցվել են մարզերում:
«Մենք չենք կարող մեզ ազատ միջավայրի առաջադեմ մարդիկ համարել, եթե այս հասարակության մեջ յուրաքանչյուր ոք, անկախ իր բնակության վայրից, իր զարգացման յուրահատկություններից, չունի ինքնադրսևորման լիարժեք հնարավորություն, իրեն պաշտպանված չի զգում, չունի ինքնադրսևորման միջավայր»,- ասաց Խզմալյանը:
Փոխնախարարն ընդգծեց՝ բավարարված է արդյունքներով: 50 արվեստագետ հնարավորություն է ունեցել շփվել 1000-ավոր աշակերտների հետ: Նրա համոզմամբ՝ շփումը հնարավորություն է տալիս մասնագիտական կողմնորոշում ձևավորել:
«Շատ աշակերտներ առաջին անգամ են շփվում նկարչի, դերասանի, ռեժիսորի, կոմպոզիտորի հետ: Մենք ակամա կարող ենք նպաստել տաղանդների դրսևորմանն ու բացահայտմանը և, դրանից բացի, այս հանդիպումներով մենք լրջացնում ենք պատանիների վերաբերմունքը արվեստի, մշակույթի, ինչպես նաև մշակույթի գործչի նկատմամբ»,- նշեց նա:
«Երեխաների հատուկ ստեղծագործական կենտրոն» ՊՈԱԿ-ի տնօրեն Աննա Կարապետյանի խոսքով՝ տարին լի է եղել զանազան միջոցառումներով: Սաները ստացել են ավելի քան 100 մրցանակ, մասնակցել են տարբեր միջոցառումների: Նախկին 600 փոխարեն սաների թիվը հասել է 935-ի: Գործում է 145 խմբակ մարզերում և Երևանում:
«2023 թվականին մենք ջանք չենք խնայելու մեր գործընկերների հետ միասին շարունակելու մեր աշխատանքը: Ունենք մեծ նպատակներ, շատ ծրագրեր՝ երեխաներին ապահովելու գեղագիտական կրթություն՝ ուղղորդելով արվեստի և արհեստի բաժիններ: Լինելով արտադպրոցական հաստատություն՝ ևս մեկ անգամ հաստատեցինք, որ արվեստն այն ոլորտն է, որը տալիս է հնարավորություն երեխաներին ինքնադրսևորվելու, ստեղծագործելու և ինտեգրվելու հասարակության մեջ:
Հանդիպման ընթացքում շնորհակալագրեր հանձնվեցին «Երաժշտական և արվեստի դպրոցներում ներառականության ապահովմանն ուղղված դասընթացներ» ծրագրի բանախոսներին: Այնուհետև Երեխաների հատուկ ստեղծագործական կենտրոնի ժեստերի երգչախումբը և «Արևային զանգակներ» համույթը հանդես եկան կատարումներով: