Դերասան Սամվել Թադևոսյանի մասնակցությամբ «Լուկա» ֆիլմն ընդգրկվել է Ռոտերդամի կինոփառատոնի մրցութային ծրագրում
2 րոպեի ընթերցում
ԵՐԵՎԱՆ, 22 ԴԵԿՏԵՄԲԵՐԻ, ԱՐՄԵՆՊՐԵՍ: Ռեժիսոր Ջեսիկա Վուդվորթի «Լուկա» (աշխատանքային վերնագիրը «Ամրոց») լիամետրաժ խաղարկային ֆիլմն ընդգրկվել է աշխարհի հեղինակավոր փառատոներից մեկում՝ Նիդերլանդներում կայացող Ռոտերդամի միջազգային կինոփառատոնի «Մեծ էկրան» մրցութային ծրագրում։
«Արմենպրես»-ի հաղորդմամբ՝ Հայաստանի ազգային կինոկենտրոնը տեղեկացնում է, որ ֆիլմում Հայաստանն ունի ինչպես ֆինանսական, այնպես էլ ստեղծագործական մասնակցություն. այն ստացել է կինոկենտրոնի ֆինանսական աջակցությունը, իսկ գլխավոր երկու դերակատարներից մեկը հայ դերասան Սամվել Թադևոսյանն է: Նրա խաղընկերներն են հոլիվուդյան հայտնի դերասանուհի Ջերալդին Չապլինը, բազմաթիվ մրցանակների արժանացած դերասան Յոնաս Սմուլդերսը։ Ֆիլմը նկարահանվել է Սիցիլիայում։
Հայաստանի ազգային կինոկենտրոնն այս եզակի համագործակցության համար շնորհավորում է ֆիլմի արտասահմանյան ստեղծագործական և տեխնիկական ամբողջ կազմին, ֆիլմում ընդգրկված «Դոկինո» ընկերության հետ համագործակցող ստեղծագործողներին և ընկերության հիմնադիր-պրոդյուսեր Անժելա Ֆրանգյանին։
Ֆիլմը Բելգիայի, Իտալիայի, Նիդերլանդների և Բուլղարիայի, Հայաստանի համատեղ արտադրություն է։ Հայաստանը, Բուլղարիայի հետ մեկ թիմ ստեղծելով, կարողացել է որպես լիիրավ պրոդյուսերական կողմ Եվրիմաժից աջակցություն ստանալ, ինչն առաջին այդպիսի փորձն էր Հայաստանի համար՝ որոշակի գումար Հայաստան բերելու հնարավորություն ստեղծելով։