2 րոպեի ընթերցում
ԵՐԵՎԱՆ, 15 ԴԵԿՏԵՄԲԵՐԻ, ԱՐՄԵՆՊՐԵՍ: Վրաստանի նախկին նախագահ Միխեիլ Սահակաշվիլին Եվրախորհրդարանի պատգամավորների խնդրանքով դադարեցրել Է հացադուլը այդ մասին հայտարարելուց մի քանի ժամ անց. քաղաքական գործչի համապատասխան նամակը լրագրողներին ընթերցել Է նրա փաստաբան Վախթանգ Բարամաշվիլին։ Այդ մասին «Արմենպրես»-ը տեղեկանում Է «РИА Новости» գործակալությունից:
«Ես ուղերձ եմ ստացել Եվրախորհրդարանի պատգամավորներից, որոնք կտրականապես խնդրել են ինձ՝ դադարեցնել հացադուլն այս փուլում, որպեսզի համապատասխան ծառայություններին հիմք չտամ պնդելու, որ ես վնաս եմ հասցնում ինձ։ Միևնույն ժամանակ, Եվրախորհրդարանի պատգամավորները խոստանում են կենտրոնացնել ողջ դիվանագիտական ջանքերը իմ նվազագույն իրավունքների պաշտպանությունն ապահովելու համար:
Ես ինձ վատ եմ զգում ոչ թե այն պատճառով, որ դիտավորյալ սնունդ չեմ ընդունել, այլ այն պատճառով, որ ինձ թունավորել են…», - ասվում է նամակում։ Սահակաշվիլին նշում է, որ ինքն ամիսներ շարունակ եղել Է անպատշաճ վերաբերմունքի զոհ, ինչը հաստատում են աշխարհի լավագույն փորձագետները, այդ թվում՝ «Նոբելյան մրցանակի» դափնեկիրները»:
Ավելի վաղ «Արմենպրես»-ը հայտնել էր, որ Սահակաշվիլին հացադուլ է հայտարարել այն բանից հետո, երբ քրեակատարողական ծառայությունը նրան հնարավորություն չի տվել հեռավար կարգով մասնակցել իր բանտարկության հնարավոր հետաձգման շուրջ դատավարությանը: Բժիշկները Սահակաշվիլիին թույլ չէին տվել ներկայանալ դատարան՝ առողջական վիճակի պատճառով։ Սպասվում էր, որ քաղաքական գործիչն ուղիղ եթերում կմիանա դատավարությանն այն կլինիկայից, որտեղ նա բուժում է ստանում բանտում երկարատև հացադուլից հետո։ Սակայն քրեակատարողական ծառայությունում պարզաբանել էին, որ իրենք չունեն համապատասխան տեխնիկական սարքավորում։ Նախկին նախագահի համախոհները վստահ են, որ Վրաստանի կառավարությունն ամեն բան անում է, որպեսզի Սահակաշվիլին չհայտնվի հանրության առջև