Այսուհետ Քաղաքացիական ակտերի գրանցման գործակալությունը փաստաթղթերն ապոստիլով կվավերացնի նաև ընդմիջման ժամերին
1 րոպեի ընթերցում
![Այսուհետ Քաղաքացիական ակտերի գրանցման գործակալությունը փաստաթղթերն ապոստիլով կվավերացնի նաև ընդմիջման ժամերին](http://armenpress.am/resized/480/static/news/b/2022/11/1096967.jpg)
ԵՐԵՎԱՆ, 10 ՆՈՅԵՄԲԵՐԻ, ԱՐՄԵՆՊՐԵՍ: Արդարադատության նախարարությունը, հավատարիմ մնալով ՀՀ կառավարության որդեգրած քաղաքականությանը և իր հանձնառությանը, շարունակաբար քայլեր է ձեռնարկում քաղաքացիներին մատուցվող ծառայությունների որակի բարձրացման և պետական մարմինների հետ հարաբերություններում վերջիններիս համար հնարավոր բարդությունները բացառելու ուղղությամբ։
Ինչպես «Արմենպրես»-ին տեղեկացրին ՀՀ արդարադատության նախարարությունից, այսուհետ նախարարության Քաղաքացիական ակտերի գրանցման գործակալության կողմից մատուցվող ամենապահանջված ծառայություններից մեկը՝ փաստաթղթերն ապոստիլով վավերացնելու ծառայությունը հասանելի կլինի նաև ընդմիջման ժամերին։ «Այս բարեփոխմամբ էականորեն կկրճատվի ՀՀ և օտարերկրյա քաղաքացիների մասնակցությամբ հերթերի կուտակումը։ Բարեփոխումը առաջընթաց է հատկապես ապոստիլով վավերացման ծառայությունից օգտվող պետական և մասնավոր հատվածում աշխատող մեր հայրենակիցների և օտարերկրյա քաղաքացիների համար, որոնք կարող են անհրաժեշտ ծառայությունն ստանալ իրենց համար առավել հարմար ընդմիջման ժամերին՝ արդյունավետ կառավարելով աշխատանքային օրը»,- պարզաբանում է ՀՀ արդարադատության նախարարությունը։