ԿԳՄՍ նախարարն ընդունեց Բրյուսովի անվան համալսարանի՝ բողոքի ակցիա անցկացնող ուսանողներին

ԵՐԵՎԱՆ, 18 ՀՈԿՏԵՄԲԵՐԻ, ԱՐՄԵՆՊՐԵՍ։ Երեք բուհերի միավորման դեմ բողոքող Վալերի Բրյուսովի անվան համալսարանի ուսանողներն ակցիա անցկացրեցին ՀՀ կրթության, գիտության, մշակույթի և սպորտի նախարարություն մոտ։ Իրենց մտահոգող հարցերը բարձրաձայնելուց հետո, նրանք հանդիպեցին նախարար Վահրամ Դումանյանին՝ փոխանցելով հոկտեմբերի 19–ին համալսարանի գիտխորհրդի նիստին մասնակցելու վերաբերյալ նամակ-հրավերը։

«Արմենպրես»-ի հաղորդմամբ՝ ուսանողների հետ հանդիպմանը նախարարը ներկայացրեց բուհերի միավորման ծրագրի վերաբերյալ իրենց գերատեսչության մոտեցումը: Մասնավորապես՝ նախարար Դումանյանը ուսանողներին տեղեկացրեց, որ գործընթացը գաղտնի չի անցկացվում, ամեն հարց հրապարակային ներկայացվում է։ Նա հավելեց, որ դեռ օգոստոսին կայացել է ռեկտորների հանդիպում։ Ռեկտորները իրազեկված են եղել բուհերի միավորման գործընթացի վերաբերյալ։

«Կարծում եմ, դուք տեղյակ չեք որոշ հանգամանքներից, դրանք պատշաճ չեն մատուցվել ձեզ։ Նախագիծը հոկտեմբերի 7-ին, սահմանված կարգով ներկայացվել է արդարադատության նախադրություն համապատասխան եզրակացության համար»,- նշեց Դումանյանը։

Նախարարն ակնկալում է, որ իրենք պատշաճ կիրազեկվեն նաև բուհում տեղի ունեցող գործընթացների վերաբերյալ։ Դումանյանը հիշեցրեց, որ որպես լիազոր մարմին՝ տեղեկացված չեն եղել բուհի հոգաբարձուների խորհրդի օրակարգից։

«Դեռ օգոստոսի 9-ին ձեր և նշված բուհերի ռեկտորների հետ իմ աշխատասենյակում կայացել է հանդիպում, որտեղ հստակ ասվել է, որ կա բուհերի միավորման գաղափարը։ Մենք միշտ և հիմա էլ պատրաստ ենք առողջ քննարկման»,- նշեց Դումանյանը՝ դիմելով ուսանողներին։

Նախարարը շեշտեց, որ նորից պատրաստ են հանդիպել և քննարկում ունենալ խնդիրների վերաբերյալ, եթե կան այդպիսիք։ Նախագծի նախնական տարբերակը, որն աշխատանքային փաստաթուղթ է, կարող է վերամշակվել, փոփոխվել՝ հաշվի առնելով խնդիրներն ու մտահոգությունները։

Ուսանողները տեղեկացրին, որ նախարարին ևս մեկ անգամ հրավիրում են գիտական խորհրդի նիստին՝ ակնկալելով նրա մասնակցությունը։