1 րոպեի ընթերցում
ԵՐԵՎԱՆ, 18 ՀՈԿՏԵՄԲԵՐԻ, ԱՐՄԵՆՊՐԵՍ: Պետական ֆինանսական աջակցություն ստացած դեբյուտանտ Օվսաննա Շեկոյանի «Գլխիվար» կարճամետրաժ ֆիլմը Կիպրոսի կարճամետրաժ ֆիլմերի միջազգային կինոփառատոնում 2-րդ մրցանակի է արժանացել «Լավագույն կարճամետրաժ ֆիլմ» անվանակարգում։
«Արմենպրես»-ի հաղորդմամբ՝ այս մասին հայտնում Է Հայաստանի ազգային կինոկենտրոնը:
Արտադրող ընկերությունը «Pose Media»-ն է, ռեժիսորն ու սցենարի հեղինակն Օվսաննա Շեկոյանն է, պրոդյուսերն ու բեմադրող օպերատորն Անդրանիկ Սահակյանն է:
Րաֆֆին ֆիզկուլտուրայի երիտասարդ ուսուցիչ է փոքր գյուղի դպրոցում: Նրա սովորական առօրյայում ամեն ինչ փոխվում է, երբ դասի ժամանակ երեխաներից մեկն ուշագնաց է լինում: Իրավիճակն ավելի է լարվում, երբ Րաֆֆին խոստովանում է, որ երեխաները, որպես նախավարժանք, ձեռքերի վրա գլխիվար կանգնելիս են եղել զրոյից ցածր ջերմաստիճան ունեցող մարզասրահում: