ՀՀ ԱԳ փոխնախարարը և Վրաստանում ՆԱՏՕ-ի Կապի գրասենյակի ղեկավարը քննարկել են համագործակցության օրակարգային հարցեր
1 րոպեի ընթերցում
![ՀՀ ԱԳ փոխնախարարը և Վրաստանում ՆԱՏՕ-ի Կապի գրասենյակի ղեկավարը քննարկել են համագործակցության օրակարգային հարցեր](http://armenpress.am/resized/480/static/news/b/2022/10/1094644.jpg)
ԵՐԵՎԱՆ, 11 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ ԱԳ նախարարի տեղակալ Պարույր Հովհաննիսյանը հոկտեմբերի 11-ին ընդունել է Վրաստանում ՆԱՏՕ-ի Կապի գրասենյակի ղեկավար Ալեքսանդր Վիննիկովին:
Ինչպես «Արմենպրես»-ին տեղեկացրին ՀՀ արտաքին գործերի նախարարությունից, կողմերը քննարկել են Հայաստան-ՆԱՏՕ համագործակցության օրակարգային հարցեր: Անդրադարձ է կատարվել հայկական խաղաղապահ ստորաբաժանումների շարունակական ներգրավվածությանը միջազգային խաղաղապահ առաքելություներին, այդ թվում՝ ՆԱՏՕ-ի հովանու ներքո:
Ըստ աղբյուրի՝ հանդիպման ընթացքում քննարկվել են միջազգային և տարածաշրջանային անվտանգությանը վերաբերող հարցեր: Հայկական կողմը կարևորել է ադրբեջանական զինված ուժերի՝ ՀՀ ինքնիշխան տարածքն անհապաղ լքելու, հայ ռազմագերիների հայրենադարձման և հրադադարի ռեժիմի անվերապահ պահպանման անհրաժեշտությունը։ Այս համատեքստում կարևորվել է ՆԱՏՕ-ի շարունակական աջակցությունը ԵԱՀԿ Մինսկի խմբի համանախագահության գործունեությանը Լեռնային Ղարաբաղի հակամարտության խաղաղ գործընթացի առաջմղման հարցում։