Անհետաձգելի կապիտալ ծրագիր նախնական ընդգրկվել է Շիրակի մարզի 21 դպրոցի վերանորոգման հայտ
2 րոպեի ընթերցում
![Անհետաձգելի կապիտալ ծրագիր նախնական ընդգրկվել է Շիրակի մարզի 21 դպրոցի վերանորոգման հայտ](http://armenpress.am/resized/480/static/news/b/2022/08/1091349.jpg)
ԳՅՈՒՄՐԻ, 30 ՕԳՈՍՏՈՍԻ,ԱՐՄԵՆՊՐԵՍ: Շիրակի մարզպետարանը, վարչապետի հանձնարարականով, ներկայացրել է մարզի 21 դպրոցի վերանորոգման հայտ, որոնք փոխվարչապետի մոտ կայացած քննարկման ժամանակ նախնական ընդգրկվել են անհետաձգելի կապիտալ բնույթի ծրագիր։ «Արմենպրես»-ի հաղորդմամբ՝ այս մասին օգոստոսի 30-ին մարզի դպրոցների տնօրենների օգոստոսյան խորհրդակցության ժամանակ նշեց Շիրակի մարզպետ Նազելի Բաղդասարյանը՝ տեղեկացնելով, որ նախատեսվում է շուրջ 553 մլն դրամ գումարի շրջանակներում դպրոցներում իրականացնել տանիքների նորոգման, դռների, պատուհանների փոխարինման, սանհանգույցների, աստիճանների վերակառուցման, տարածքների բարեկարգման աշխատանքներ։
«Կառավարությունը հավատարիմ է խոստմանն, ու 300 դպրոց, 500 մանկապարտեզ ծրագիրը քայլ-քայլ կյանքի է կոչվում։ Կրթական ոլորտը, լինելով առաջնային ոլորտ պետական համակարգում, վերջին տարիներին բազմաթիվ փոփոխությունների է ենթարկվել, այդ թվում՝ օրենսդրական, որոնք բերել են նոր որակ: Ես լիահույս եմ, որ այդ մոտեցումների ընկալումը, ինչպես նաև հստակ չափորոշիչների սահմանումը անմիջականորեն ազդեցություն է ունենալու մեր կրթության որակի վրա՝ դրական առումով: Մեզ համար չափազանց կարևոր է կրթության պատշաճ որակը, կարևոր հանգամանք է, որ աշակերտը դպրոց մուտք գործելիս հասկանա, որ սա կրթական հաստատություն է»,- ընդգծեց մարզպետը։
ԱրմենուհիՄխոյան