1 րոպեի ընթերցում
ԵՐԵՎԱՆ, 28 ՀՈՒԼԻՍԻ, ԱՐՄԵՆՊՐԵՍ: Հուլիսի 28-ին Վրաստանի արտգործնախարար Իլյա Դարչիաշվիլին պաշտոնական այցով մեկնել է Թուրքիա։
Այս մասին, ինչպես հաղորդում է «Արմենպրես»-ը, հայտնում են թուրքական ԶԼՄ-ները:
Թուրքիայի արտգործնախարար Մևլութ Չավուշօղլուի և Իլյա Դարչիաշվիլիի հանդիպման օրակարգում ընդգրկված են եղել Թուրքիայի և Վրաստանի երկկողմ հարաբերությունների հետ կապված հարցեր, ինչպես նաև մտքերի փոխանակում է տեղի ունեցել տարածաշրջանային և միջազգային հարցերի շուրջ։
Ստամբուլում արտգործնախարարների հանդիպումից հետո տեղի է ունեցել համատեղ մամուլի ասուլիս, որի ժամանակ Թուրքիայի արտգործնախարարն անդրադարձել է նաև Բաքու-Թբիլիսի-Կարս երկաթգծի նշանակությանը:
«Թուրքիան կողմ է Չինաստան - Ղազախստան - Կասպից ծով - Ադրբեջան - Վրաստան - Թուրքիա (Սև ծով) - Եվրոպա տրանսպորտային միջանցքի առավել ակտիվ օգտագործմանը, որի կարևոր օղակը Բաքու-Թբիլիսի-Կարս երկաթգիծն է»,-ասել է նա:
Նրա խոսքով, ուկրաինական պատերազմի ֆոնին այդ միջանցքի նշանակությունը մեծացել է։
«Սա կարևոր է ոչ միայն տարածաշրջանի երկրների, այլև միջազգային առևտրի և նյութատեխնիկական ապահովման համար»,- ընդգծել է նա: