Մեկնարկեց «Ներառական կրթություն» խորագրով համահայկական գիտակրթական աշխատաժողով
2 րոպեի ընթերցում
![Մեկնարկեց «Ներառական կրթություն» խորագրով համահայկական գիտակրթական աշխատաժողով](http://armenpress.am/resized/480/static/news/b/2022/07/1087378.jpg)
ԵՐԵՎԱՆ, 1 ՀՈՒԼԻՍԻ, ԱՐՄԵՆՊՐԵՍ: Մեկնարկեց «EduArmenia2022» համահայկական գիտակրթական աշխատաժողովը, որը կրում է «Ներառական կրթություն» խորագիրը: Ինչպես տեղեկացնում է «Արմենպրես»-ի թղթակիցը, աշխատաժողովի մեկնարկին ՀՀ ԿԳՄՍ նախարարի տեղակալ Ժաննա Անդրեասյանը նշեց, որ ներառական կրությունը ոլորտի առանցքային թեմաներից մեկն է:
«Մենք գիտենք, որ այս տարի հանրակրթության մասին օրենքում գնացինք սկզբունքային փոփոխությունների՝ էապես վերանայելով ներառական կրթությանն առնչվող դրույթները: եթե ուզում ենք մեր կրթությունը կազմակերպել որակյալ , ապա պետք է հաշվի առնենք յուրաքանչյուր երեխայի առանձնահատկությունը»- նշեց նա:
«EduArmenia»-ի համահիմնադիր Լիլիթ Մկրտչյանը շեշտեց, որ ամեն տարի համահայկական գիտակրթական աշխատաժողովի նպատակները տարբեր են: Նրա խոսքով՝ իրենց ցանկությունն է, որ այն բոլոր ելույթներն ու դասախոսությունները, որոնք աշխատաժողովի 4 օրերի ընթացքում հնչեն՝ ազդեցիկ ու կիրառելի լինեն:
«Ուզում եմ, որ բոլոր գաղափարները տեղափոխվեն գործողությունների դաշտ և մենք կարճ ժամանակում քաղենք դրանց պտուղները,- ասաց նա:
Հայկական պետական մանկավարժական համալսարանի ռեկտոր Սրբուհի Գևորգյանի խոսքով՝ ներառական կրթությունը կարևոր հիմնախնդիր է կրթության ծրագրային բարեփոխումների մեջ:
Աշխատաժողովը տեղի է ունենալու հուլիսի 1- 4-ը։ Հուլիսի 1-2-ին աշխատանքները կիրականացվեն առկա ձևաչափով, գրանցվել է շուրջ 700 մասնակից:
Հուլիսի 3-4-ին աշխատանքները կանցկացվեն առցանց ձևաչափով: Շուրջ 60 խոսնակներ հանդես կգան զեկույցներով: