«Նոր գիրք»-2/22. Քրիստի, Քոքրեյն, Մասկ 

ԵՐԵՎԱՆ, 7 ՓԵՏՐՎԱՐԻ, ԱՐՄԵՆՊՐԵՍ: «Արմենպրես»լրատվական գործակալությունը ներկայացնում է իր հեղինակային «Նոր գիրք» նախագիծը: Այն ամեն երկուշաբթի ընթերցողի դատին է հանձնում հայաստանյան հրատարակչությունների լույս ընծայած գրքերը: Գործակալության էջերում ընթերցասերները հնարավորություն ունեն տեղեկատվություն ստանալ նոր գրքերի մասին, ծանոթանալ դասական գործերին և արդի գրականության զարգացման միտումներին: Այս շաբաթ«Արմենպրես»-ն առանձնացրել է տարբեր հրատարակչությունների` 2022 թվականին հրատարակած երեք ուշագրավ գրքեր:

Թարգմանական գրականություն

Ագաթա Քրիստի, «Մահ Նեղոսի վրա»

Ագաթա Քրիստիի «Մահ Նեղոսի վրա» վեպը դետեկտիվ ժանրի համաշխարհային բեսթսելերներից է։ Գործողությունները զարգանում են հռչակավոր խուզարկու Էրքյուլ Պուարոյի աչքի առջև, որը հերթական անգամ ակամա հայտնվում է դեպքերի

կիզակետում:Մեծահարուստների եգիպտոսյան անհոգ ճամփորդությունը փոթորկվում է մեղրամիսը վայելող երիտասարդ, հարուստ ու հաջողակ Լինեթ Ռիջուեյի սպանությամբ։ Մի բան է միայն ստույգ. հանցագործը նավի ուղևորներից է։ Իմաստուն խուզարկուն, գործի դնելով վերլուծության իր հոգեբանական

մեթոդները, պետք է բացահայտի մարդասպանին, որին ոչ ոք չի կասկածում: Գիրքը լույս է ընծայել «Էդիթ Պրինտ» հրատարակչությունը:

Մանկապատանեկան գրականություն

Ջոզեֆին Քոքրեյն, «Պրպտուն խելքը կգտնի ելքը»

Այսօր դժվար է պատկերացնել, բայց ժամանակին մարդիկ տներում հոսող ջուր չեն ունեցել և աշխատել են քիչ սպասքով բավարարվել: Ախր, աման լվանալը մեծ պատմություն էր. պետք էր գետից կամ լճից, կամ լավագույն դեպքում ջրհորից դույլերով ջուր կրել…Հատուկ փոքրիկների համար այս գրքով հնարավորություն է ընձեռվում ծանոթանալ Քոքրեյնի՝ ամերիկացի գյուտարի հետ, ով ստեղծել է աման լվացող մեքենան։ Գիրքը լույս է ընծայել «Անտարես» հրատարակչությունը:

Փաստավավերագրական գրականություն

Իլոն Մասկ, «Երբ բոլորը քո դեմ են․ Իլոն Մասկն ինքն իր մասին»

«Երբ բոլորը քո դեմ են․ Իլոն Մասկն ինքն իր մասին» գրքում ամփոփված են մեջբերումներ աշխարհի ամենահայտնի մարդկանցից մեկի՝ Իլոն Մասկի հարցազրույցներից ու ելույթներից:

Գրքում թեմատիկ բաժիններով առանձնացված են Իլոն Մասկի գործունեության տարբեր ոլորտները՝ SpaceX և Մարսի գաղութացում, Tesla Motors և էլեկտրամոբիլների տարածում, SolarCity և կանաչ էներգետիկա: Բացի դա, մեջբերված են Մասկի ուշագրավ հայտարարություններն ու գաղափարները կադրային քաղաքականության, աշխատանքի և, առհասարակ, կյանքի մասին:

Գիրքը, թերևս, ամենաամփոփ ու ընդգրկուն հայալեզու աղբյուրն է, որով կարելի է պատկերացում կազմել աշխարհի ամենանպատակասլաց մարդու անցած ճանապարհի, անհաջողությունների ու հաջողությունների, ինչպես նաև ապագայի վերաբերյալ նրա տեսլականի մասին:

Գիրքը հրատարակել է «ԴաՎինչի» հրատարակչությունը, թարգմանիչն է Արմինե Ղազարյանը։

«Նոր գիրք»-ը ներկայացրեց Ռոզա Գրիգորյանը