Ռոբերտ Քոչարյանը կողմնակից է կառավարման կիսանախագահական համակարգին
1 րոպեի ընթերցում
![Ռոբերտ Քոչարյանը կողմնակից է կառավարման կիսանախագահական համակարգին](http://armenpress.am/resized/480/static/news/b/2021/12/1071778.jpg)
ԵՐԵՎԱՆ, 27 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ երկրորդ նախագահ Ռոբերտ Քոչարյանը կողմնակից է կառավարման կիսանախագահական համակարգին, բայց դեմ է իշխանության կողմից որդեգրած ճանապարհով սահմանադրական բարեփոխումների իրականացմանը:
«Արմենպրես»-ի հաղորդմամբ` Քոչարյանն այս մասին ասաց ամփոփիչ ասուլիսի ժամանակ:
«Ես ճիշտ չեմ համարում, որ ամեն իշխանություն գա և իր ուզած ձևով Սահմանադրություն բերի: Ես նույնիսկ չգիտեմ, թե ինչ մոդել է առաջարկվում: Կարող եմ միայն ասել, որ ոչ մի նախագահ այդպիսի լիազորություններ չի ունեցել, ինչքան այսօր ունի վարչապետը: Սա նորմալ չէ, բայց այդ լիազորությունների վերաբաշխումը հիմա կարելի է անել օրենքներով: Օրինակ` կարելի է քննչական մարմինները հանել վարչապետի ենթակայությունից: Ի տարբերության նախորդ Սահմանադրության, երբ բոլոր փոփոխությունները ենթադրում էին հանրաքվե, հիմա բավականին փոփոխություններ կան, որ կարելի է անել խորհրդարանի միջոցով»,- ասաց Քոչարյանը:
ՀՀ երկրորդ նախագահն առաջարկում է իշխանություններին մի քանի քայլ անել վարչապետի լիազորությունները նվազեցնելու ուղղությամբ: