Շախմատի տղամարդկանց թիմը Եվրոպայի առաջնությունում դեռ 5-րդն է, կանայք` 13-րդը

ԵՐԵՎԱՆ, 20 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի շախմատի կանանց և տղամարդկանց թիմերը շարունակում են ելույթները Եվրոպայի թիմային առաջնությունում:

«Արմենպրես»-ի հաղորդմամբ` տղամարդկանց թիմը 7-րդ տուրում մրցեց Իսպանիայի հետ: Գրանցվեց ոչ-ոքի արդյունք: Բոլոր պարտիաներում գրոսմայստերները կիսեցին միավորը: Այս տուրից հետո հավաքականը մրցաշարային աղյուսակում 5-րդն է:

Կանանց ընտրանին ևս ոչ-ոքի ավարտեց մրցախաղը` մրցելով Սերբիայի հետ: Զավեն Անդրիասյանի գլխավորած թիմը մրցաշարային աղյուսակում 13-րդն է:

Առաջնության ավարտին մնաց երկու տուր:

Շախմատի Եվրոպայի տղամարդկանց առաջնությանը մասնակցում են 39, իսկ կանանցը` 31 թիմեր: Մրցաշարերն անցկացվում են շվեյցարական մրցակարգով և բաղկացած են 9-ական տուրերից: