2018-ից սկսած սուբվենցիոն ծրագրերով մարզերում իրականացված ծրագրերը հասնում են 200 մլն դոլարի
3 րոպեի ընթերցում
ԵՐԵՎԱՆ, 4 ՆՈՅԵՄԲԵՐԻ, ԱՐՄԵՆՊՐԵՍ: Կառավարությունն 9 մարզերի մարզպետարաններին գումար է հատկացնում՝ սուբվենցիոն ծրագրերի իրականացման նպատակով։ Ինչպես փոխանցում է «Արմենպրես»-ը, այդ մասին որոշումն ընդունվեց կառավարության նիստում:
Տարածքային կառավարման և ենթակառուցվածքների նախարար Գնել Սանոսյանը նշեց, որ կարիք է առաջացել ՀՀ պետական բյուջեից մարզպետարաններին հատկացնել ևս 532 մլն դրամ՝ համապատասխան շինարարական աշխատանքները ֆինանսավորելու համար։
Վարչապետ Նիկոլ Փաշինյանը նշեց, որ 2018 թվականին քաղաքական որոշում են կայացրել, որ սուբվենցիոն ծրագրերը պետք է դառնան տարածքային համաչափ զարգացման առանցքային գործիքը։ «Սուբվենցիոն ծրագրերի էությունը հետևյալն է՝ մենք համայնքներին առաջարկում ենք ներկայացնել ենթակառուցվածքների զարգացման և կապիտալ ներդրումների ծրագրեր, որոնք ներկայացվում են կառավարություն։Կառավարությունը քննարկում է, հավանություն է տալիս այդ ծրագրերին և իրականացնում է համալիր ֆինանսավորում. ըստ բովանդակության տարբեր տոկոսներով է իրականացնում այդ համաֆինանսավորումը։ Եվ այսօր մենք հերթական չափաքանակն ենք հատկացնում 9 մարզերին՝ սուբվենցիոն ծրագրերն իրականացնելու և վճարելու համար։ Նախկինում մենք Սյունիքի մարզին առանձին վճարումներ իրականացրել ենք։ Ընդհանարապես Սյունիքի մարզին, բացի սուբվենցիոն ծրագրերից, նաև 1 մլրդ դրամ հատկացում արեցինք՝ մարզի դիմակայունությունը բարձրացնելու նպատակով։ Նաև վերջերս ևս 500 մլն դրամի հատկացում արեցինք, որը նույնպես պետք է այս ընդհանուր ծրագրերի իրականացման պրոցեսում հաշվի առնել»,- ասաց վարչապետը։
Նիկոլ Փաշինյանի խոսքով՝ 2018-2020 թվականների ընթացքում սուբվենցիոն ծրագրերի շրջանակներում բոլոր մարզերում իրականացվել է 1193 ծրագիր։ Ընդհանուր գումարը կազմել է ավելի քան 47 մլրդ դրամ։ Ծրագրերի բովանդակությունը հետևյալն է՝ բնակավայրերի փողոցների կառուցում, նորոգում, ասֆալտապատում, խմելու ջրամատակարարման և ջրահեռացման համակարգերի կառուցում, նորոգում, հիմնանորոգում, ոռոգման համակարգերի կառուցում կամ նորոգում, փողոցային լուսավորության կառուցում, վերականգնվող էներգետիկա, բնակարանների գազաֆիկացում, մանկապարտեզների կառուցում կամ նորոգում և այլն։
«Ըստ էության, երբ ծրագրերը վերլուծում ենք, հասկանալի է դառնում, որ 2018-2020 թվականներին գործնականում պիտի չունենանք գեթ մեկ բնակավայր, որտեղ շատ կոնկրետ շոշափելի սուբվենցիոն ծրագրեր չեն իրականացվել։ Սուբվենցիոն ծրագրերով առաջատար են այն մարզերը, որտեղ խոշորացումն արդեն տեղի էր ունեցել և լիարժեք գործարկման մեջ էր։ Եթե 2018-2020 թվականներին իրականացրել ենք ավելի քան 47 մլրդ դրամի սուբվենցիոն ծրագիր, ապա միայն 2021 թվականին այս պահին ընթացքի մեջ են 678 ծրագրեր՝ 48 մլրդ 400 մլն դրամ արժեքով»,- ասաց կառավարության ղեկավարը՝ հավելելով, որ 2018-ից սկսած մարզերում սուբվենցիոն ծրագրերի ծավալը ընդհանուր հասնում է 200 մլն դոլարի:
