Հայտարարվել է գիտական հետազոտությունների հայ-գերմանական համատեղ թեմաների աջակցության մրցույթ

ԵՐԵՎԱՆ, 2 ՀՈՒՆԻՍԻ, ԱՐՄԵՆՊՐԵՍ: ՀՀ ԿԳՄՍՆ գիտության կոմիտեն հայտարարում է գիտական հետազոտությունների հայ-գերմանական համատեղ թեմաների աջակցության մրցույթ: Ինչպես «Արմենպրես»-ին հայտնեցին ՀՀ ԿԳՄՍ նախարարությունից, այն Գիտության կոմիտեի և ԳԴՀ կրթության և հետազոտությունների դաշնային նախարարության միջև 2011 թվականին ստորագրված «Գիտության և տեխնոլոգիաների ոլորտներում համագործակցության զարգացման մասին» մտադրությունների հուշագրի շրջանակում անցկացվող երրորդ մրցույթն է:

Մրցույթի նպատակն է խթանել երկու երկրների գիտական կազմակերպությունների և բուհերի միջև համագործակցային կապերը՝ երկկողմ հետաքրքրություն ներկայացնող գիտական նախագծերի իրականացմանն աջակցություն տրամադրելու միջոցով, օժանդակել երիտասարդ գիտնականների շարժունության բարձրացմանը, ինչպես նաև հիմքեր ստեղծել համատեղ գիտական խմբերի՝ ԵՄ շրջանակային ծրագրերին մասնակցության համար: Հայտերի գիտական փորձաքննության ընթացքում, ի թիվս այլ չափանիշների, գնահատվելու են նաև համապատասխանությունը ԵՄ «Հորիզոն Եվրոպա» հետազոտությունների և նորարարությունների շրջանակային ծրագրի ուղղություններին ու վերջինիս մասնակցելու հեռանկարները:

Հայտերը կարող են ներկայացվել հետևյալ թեմատիկ ուղղություններով՝

• Տեղեկատվական և հաղորդակցական տեխնոլոգիաներ,
• Կայուն գյուղատնտեսություն (ներառյալ՝ սննդի տեխնոլոգիաներ և սննդի անվտանգություն),
• Կենսատեխնոլոգիա և կիրառական նշանակության բժշկագիտական հետազոտություններ,
• Ճգնաժամերի կանխմանը և ճգնաժամերի կառավարմանը նվիրված հետազոտություններ (ներառյալ՝ սոցիալական, առողջապահական և տնտեսական հարցադրումներ, ռիսկերի գնահատում և ռիսկերի կառավարում),
• Հասարակագիտական և հումանիտար հետազոտություններ՝ միջգիտակարգային հետազոտություններ:

Մրցույթին կարող են ներկայացվել նաև հայտեր, որոնք համապատասխանում են «Եվրոպական կանաչ գործարք» նախագծի առաջնահերթություններին (նախագծի վերաբերյալ մանրամասն տեղեկատվություն կարելի է ստանալ https://bit.ly/3iba1tZ կայքից):

Մրցույթի մասնակցության գիտական նախագծերի հայտերը ներկայացնում են ՀՀ և ԳԴՀ գիտնականներից կազմված խմբերը: Հայաստանյան խմբում կարող են ընդգրկվել 4-ից 10 անդամներ: Նախատեսվում է տրամադրել 12 կամ 24 ամիս տևողությամբ մինչև տասը դրամաշնորհ:

Հայտերն ընդունվում են Գիտության կոմիտեի հայտերի և հաշվետվությունների առցանց համակարգի միջոցով (https://grants.scs.am)՝ մինչև 2021 թ. օգոստոսի 31-ը ներառյալ:

Մրցույթիհրավերիփաթեթը