1 րոպեի ընթերցում
ԵՐԵՎԱՆ, 27 ՄԱՅԻՍԻ, ԱՐՄԵՆՊՐԵՍ:«Ազգային երգիչ» հեռուստանախագծից հայտնի երգիչ Արթուր Խաչենցը երգ է ներկայացրել՝ գրված Համո Սահյանի «Ես այն եմ եղել» բանաստեղծության հիման վրա: Երգի հոլովակը, որի ռեժիսորը Հրաչյա Հարությունյանն է, արդեն համացանցում է:
«Արմենպրես»-ի հաղորդմամբ՝ երաժշտությունը գրել է Արթուր Խաչենցը, գործիքավորումն իրականացրել է Վահե Հայրապետյանը:
Արթուր Խաչենցը սովորել է Երևանի Կոմիտասի անվան պետական կոնսերվատորիայում: Երաժշտասերների լայն շրջանակը երգչին ճանաչեց, երբ համացանցում տարածում գտավ նրա՝ Համո Սահյանի «Ոչինչ չի փոխվի» ստեղծագործության հիման վրա գրված երգը, այնուհետև Խաչենցը մասնակցեց «Շանթ» հեռուստատեսությամբ հեռարձակվող «Ազգային երգիչ» նախագծին: Նրա երկրպագուների բանակն էլ ավելի մեծացավ, երբ Խաչենցը Արցախյան 44-օրյա պատերազմի ընթացքում առաջնագծից հրապարակեց «Գինի լից» ռազմահայրենասիրական երգը, ինչից հետո երգիչը մի խումբ սիրված արտիստների հետ կատարեց «Մեզ ոչինչ չի հաղթի» երգը, որը մեծ ժողովրդականություն է վայելում: